कोरेगाव : आमदारांच्या हुकुमशाही प्रवृत्ती विरोधात उठाव केला असून कोरेगावची स्वाभिमानी जनता हिटलरशाही आमदारांना या निवडणुकीत धडा शिकवण्यासाठी सज्ज झाली आहे. विद्यमान आमदारांनी आरक्षण टाकून कोरेगावकरांना आव्हान देण्याचा प्रयत्न केला आहे. जनतेशी गद्दारी करून कोरेगावचा स्वाभिमान गहाण ठेवला आहे, असा घणाघात कोरेगाव विधानसभा मतदारसंघातील महाविकास आघाडीचे उमेदवार आ. शशिकांत शिंदे यांनी केला.कोरेगाव येथील आयोजित प्रचार सभेत ते बोलत होते.
आ. शशिकांत शिंदे म्हणाले, स्वतः आरक्षण टाकून माझ्याकडे या आरक्षण उठवतो असे सांगून दडपशाही चालू केली. आज ते प्रत्येकाला ऑफर देत आहेत, परंतु आमच्या सोबत निष्ठावंत लोक आहेत. विकासाच्या नावाखाली काही लोक स्वतःच्या स्वार्थासाठी गेले. त्यांचा काय स्वार्थ आहे हे जनतेला माहीत आहे. टंचाईच्या काळात येथील पाणीप्रश्न सोडवण्यासाठी प्रमाणिक प्रयत्न केला तर आमदारांनी जनतेचे पाण्यावाचून हाल केले. विकासकामांच्या नावाखाली येथील आमदारांनी स्वतःची कंत्राटदारी केली. सर्वसामान्य जनतेला वेठीस धरले.
लोकप्रतिनिधींनी कोरोनाचे राजकारण करून लोकांना दमबाजी करत आहेत. पैसा, सत्ता या माध्यमातून कोरेगावकरांना आव्हान देणारे आमदार भूमिपुत्रांनाच त्रास देत आहेत. पक्ष व नेत्यांशी गद्दारी करून त्यांनी कोरेगावच्या स्वाभिमानाला धक्का दिला असल्याने मतदार हे सहन करणार नाहीत.
सत्तेच्या गुर्मीत येथील सर्वसामान्य माणूस भरडला जात असून मनुवादी व जातीयवादी संस्कृती या मतदारसंघात आणत आहेत. मतदारसंघात पुण्याचे गुंड आणून माझ्या कार्यकर्त्यांना दमबाजी करत असताना मी शांत बसणार नाही. हिंमत असेल तर त्यांनी मला वन बाय वन भिडावे, असे आव्हानही आ. शशिकांत शिंदे यांनी दिले.
यावेळी खरेदी-विक्री संघाचे माजी चेअरमन शहाजीराव बर्गे, किशोर नानासाहेब बर्गे, किशोर रामचंद्र बर्गे, गणेश धनावडे, मनोज येवले, प्रतिभा बर्गे, मोनिका धनवडे, प्रभावती बर्गे अॅड. जयवंतराव केंजळे, दिनेश बर्गे, मनोहर बर्गे, संजय पिसाळ, अमरसिंह बर्गे, अॅड.श्रीकांत केंजळे यांच्यासह मान्यवर उपस्थित होते.