कागल : कागल विधानसभा मतदारसंघामध्ये जवळपास पुरुषांच्या बरोबरीने महिलांचे मतदान आहे. क्रांतिकारी निर्णय घेण्यात आजच्या महिला आघाडीवर आहेत. महिला विकासाचा आमचा रोडमॅप तयार आहे. मागील काही वर्षे महिलांसाठी काम करत असताना आज अनेक महिला पुढे येऊन आम्हाला प्रोत्साहन देत आहेत. यावेळी कागलमध्ये परिवर्तन करण्याचा धाडसी निर्णय स्वाभिमानी महिला भगिनींनी घेतलेला आहे. त्यामुळे कागल, गडहिंग्लज, उत्तूर मतदारसंघात परिवर्तन घडवण्यामध्ये महिलाच आघाडीवर असतील, असा विश्वास राजमाता जिजाऊ महिला समितीच्या कार्याध्यक्षा सौ. नवोदिता घाटगे यांनी व्यक्त केला. मुगळी (ता. कागल) येथे परिवर्तन संकल्प दौऱ्याप्रसंगी त्या बोलत होत्या.
यावेळी नवोदिता घाटगे म्हणाल्या, जिजाऊ महिला समितीच्या वतीने महिलांसाठी आरोग्य सुविधा पुरविल्या आहेत. महिलांचे आरोग्य सुस्थितीत राहावे यासाठी प्रयत्न करत आहोत. महिलांसाठी काही ठिकाणी आरोग्य कॅम्पचे आम्ही आयोजन केले होते.
समाजसेवा हे आमच्या घराण्याचे संस्कार आहेत. पुढेही असेच कार्य करण्यासाठी व राजर्षी छत्रपती शाहू महाराज यांच्या कार्याचा व विचारांचा वारसा पुढे नेण्यासाठी सर्वांनी ताकदीने समरजितराजेंच्या पाठीशी ठामपणे उभे राहून मतदारसंघात महिलांना आत्मसन्मान मिळवून देण्यासाठी व त्यांना आत्मनिर्भर बनविण्यासाठी परिवर्तन घडवण्याची गरज आहे. समरजित घाटगे यांना मतदान करून हे परिवर्तन महिला नक्कीच करतील, असा विश्वासही यावेळी सौ. घाटगे यांनी व्यक्त केला.
सरपंच मेघा पाटील, रंजना गुरव, रूपाली पाटील, अंबुताई येजरे, पमाताई कांबळे, लता सांगले, समिदरा लुगडे, माया सांगले, राणी नाईक, वंदना सांगले, रंजना पवार यांच्यासह महिला व ग्रामस्थ परिवर्तन संकल्प दौ-याप्रसंगी मोठ्या संख्येने उपस्थित होते. यावेळी जैन्याळ, बेलेवाडी मासा, बोरवडे, उंदरवाडी, निढोरी येथे परिवर्तन संकल्प मेळाव्यास महिलांनी उदंड प्रतिसाद दिला.