पुढारी ऑनलाईन डेस्क : भाजप विधीमंडळ गटनेतेपदी देवेंद्र फडणवीस (Devendra Fadnavis) यांची आज (दि.४) सर्वानुमते निवड झाली. विधानसभेच्या सेंट्रल हॉलमध्ये भाजपच्या विधीमंडळ पक्षाच्या बैठकीत फडणवीस यांच्या नावावर शिक्कामोर्तब झाले. दरम्यान, देवेंद्र फडणवीस महाराष्ट्राचे मुख्यमंत्री (Maharashtra CM) म्हणून उद्या ५ डिसेंबर रोजी पंतप्रधान नरेंद्र मोदी यांच्या उपस्थितीत शपथ घेणार आहेत. हा शपथविधी सोहळा मुंबईतील आझाद मैदानावर गुरुवारी सायंकाळी ५.३० वाजता होईल. उद्याच्या शपथविधी सोहळ्याच्या अधिकृत निमंत्रण पत्रिकेत देवेंद्र फडणवीस यांचा महाराष्ट्राचे मुख्यमंत्री असा उल्लेख करण्यात आला आहे.
विधानभवनाच्या मध्यवर्ती सभागृहात भाजप आमदारांच्या बैठकीत फडणवीस यांची गटनेतेपदी सर्वोनुमते निवड करण्यात आली. भाजपचे केंद्रीय निरिक्षक निर्मला सितारामन, विजय रूपाणी यांच्या उपस्थितीत गटनेतेपदाची निवड प्रक्रिया पार पडली. या बैठकीत भाजप नेते चंद्रकांत पाटील आणि सुधीर मुनगंटीवार यांनी भाजप विधिमंडळ पक्षाच्या गटनेतेपदासाठी देवेंद्र फडणवीस यांच्या नावाचा प्रस्ताव मांडला. त्याला पंकजा मुंडे, प्रवीण दरेकर, रवींद्र चव्हाण, संजय कुटे, संजय सावकारे, अशोक उईके मेघना बोर्डीकर, योगेश सागर, संभाजी पाटील-निलंगेकर, गोपीचंद पडळकर, दिलीप गोडसे, आशिष शेलार यांच्यासह इतरांनी अनुमोदन दिले. त्यानंतर विजय रूपाणी यांनी देवेंद्र फडणवीस यांची सर्वानुमते गटनेतेपदी निवड करण्यात येत असल्याची घोषणा केली.
यावेळी बोलताना भाजप प्रदेशाध्यक्ष चंद्रशेखर बावनकुळे यांनी, पीएम मोदींच्या नेतृत्त्वाखाली राज्यात डबल इंजिन सरकार आले असून हा ऐतिहासिक विजय असल्याचे म्हटले आहे.
राज्यातील विधानसभा निवडणुकीत महायुतीला (Mahayuti) २३० जागा मिळाल्या आहेत. तसेच इतर ७ आमदारांनी महायुतीला पाठिंबा दिल्याने महायुतीचे विधानसभेतील संख्याबळ २३७ वर पोहोचले आहे. विधानसभा निवडणुकीत भाजपने १३२, शिंदेंची शिवसेना ५७ आणि अजित पवारांच्या राष्ट्रवादीने ४१ जागांवर विजय मिळवला.