वाळकी : पुढारी वृत्तसेवा शेतातील विहिरीत पाय घसरून पडल्याने एकाचा मृत्यू झाल्याची घटना नगर तालुक्यातील चास शिवारात शुक्रवारी (दि.8) दुपारी घडली. अरुण बन्सी गायकवाड (वय 46, रा.चास ता.नगर) असे मयत इसमाचे नाव आहे. मयत गायकवाड हे चास गावठाणात राहत होते. ते नगर – पुणे महामार्गावरील एका पेट्रोलपंपावर कामास होते.
शुक्रवारी (दि.8) सकाळी ते मोटारसायकलवर गावच्या परिसरात असलेल्या ब्राम्हणदरा भागात असलेल्या त्यांच्या शेतात पाहणी करण्यासाठी गेले होते. शेतातील विहिरीत डोकावून पाहत असताना तोल जाऊन अथवा पाय घसरून ते विहिरीत पडले असावेत, अशी शक्यता व्यक्त केली जात आहे.
दुपारी उशिरापर्यंत ते घरी न आल्याने त्यांच्या कुटुंबीयांनी त्यांची सर्वत्र शोधाशोध केली. मात्र, त्याचा कुठेच शोध लगला नाही. त्यानंतर शेताजवळ त्यांची मोटारसायकल आढळून आली. त्यानंतर शेताच्या परिसरात शोध त्यांचा घेण्यात आला. शेवटी एकाने विहिरीत डोकावून पाहिले असता गायकवाड यांचा मृतदेह विहिरीतील पाण्यावर तरंगत असल्याचे आढळून आले.
त्यानंतर त्यांना जिल्हा शासकीय रुग्णालयात नेले असता डॉक्टरांनी उपचारापूर्वीच मयत घोषित केले. मयत अरूण गायकवाड यांच्या पश्चात आई, वडील, पत्नी, 2 मुली, 1 भाऊ असा परिवार आहे. त्यांच्या दुर्दैवी निधनाने गावामध्ये हळहळ व्यक्त होत आहे. या प्रकरणी नगर तालुका पोलीस ठाण्यात आकस्मात मृत्यूची नोंद केली आहे. पुढील तपास पो.ना.राहुल शिंदे हे करीत आहेत.