कोपरगाव (नगर), पुढारी वृत्तसेवा: संजीवनी अभियांत्रिकी महाविद्यालयाच्या ट्रेनिंग अॅण्ड प्लेसमेंट विभागाच्या प्रयत्नाने शैक्षणिक वर्ष 2022-23 मधिल मेकॅनिकल इंजिनिअरिंगच्या अंतिम सत्रातील तीन विद्यार्थ्यांची रेनाटा प्रिसिझन काम्पोनंटस् प्रा. लि. पुणे या नामांकित कंपनीने मुलाखती घेतल्या होत्या. या मुलाखतींचा निकाल कंपनीने जाहीर केला आहे. यात मेकॅनिकल इंजिनिअरिंगच्या विद्यार्थ्यांना वार्षिक 5. 5 लाखांचे पॅकेज देऊन नोकरीसाठी निवड केल्याचे जाहीर केले.
संस्थेच्या ट्रेनिंग अॅण्ड प्लेसमेंटच्या विभागामार्फत या विध्यार्थ्यांना नेमणुकीचे पत्र बहाल करण्यात आलेे, अशी माहिती संजीवनी ग्रुप ऑफ इन्स्टिट्यूट्सचे मॅनेजिंग ट्रस्टी अमित कोल्हे यांनी दिली आहे. रेनाटा प्रिसिझन काम्पोनंटस् प्रा. लि. या कंपनीने श्रेयश संभाजी लोहकणेे, शिवकुमार गुलशन पंजाबी व सत्यम राजेंद्र लासुरे या विद्यार्थ्यांची निवड केली आहे. हे सर्व विद्यार्थी ग्रामीण भागातील असून त्यांच्या हातात नोकरीचे नेमणूक पत्र दिले. तेव्हा त्यांच्या चेहर्यावर अत्यानंद दिसत होता. संजीवनी अभियांत्रिकी महाविद्यालयातील विविध विद्या शाखांमधील विद्यार्थ्यांची एका पाठोपाठ एक नामांकित कंपन्यांमध्ये नोकरीसाठी निवड होत असल्यामुळे पालक व विद्यार्थ्यांमध्ये आनंदाचे वातावरण निर्माण झाले आहे. विद्यार्थ्यांना मिळत असलेल्या नोकर्यांबाबत संस्थेचे अध्यक्ष नितिनराव कोल्हे, मॅनेजिंग ट्रस्टी अमित कोल्हे व विश्वस्त सुमित कोल्हे यांनी समाधान व्यक्त केले आहे. अमित कोल्हे यांनी 'रेनाटा' मध्ये निवड झालेल्या तीनही विद्यार्थ्यांचा छोटेखानी कार्यक्रमात सत्कार केला. यावेळी संस्थेचे डायरेक्टर (प्राचार्य) डॉ. ए.जी. ठाकुर, ट्रेनिंग अॅण्ड प्लेसमेंट डीपार्टमेंटचे डीन डॉ. व्ही. एम. तिडके, विभाग प्रमुख डॉ. एम.व्ही. नागरहल्ली उपस्थित होते.
संजीवनी इंजिनिअरिंग कॉलेजमध्ये मला प्रत्येक विषयाचे प्रात्यक्षिकांसह सखोल ज्ञान मिळाले. याचबरोबर कॉलेजमध्ये अभ्यासाव्यतिरिक्त जे उपक्रम राबविल्या जातात, त्यात माझा नेहमी सहभाग असायचा. यामुळे माझ्या व्यक्तिमत्वाची चांगली जडणघडण झाली. ट्रेनिंग अॅण्ड प्लेसमेंट विभागाने माझ्यात सॉफ्ट स्किल्स विकसित केल्या. आणि माझ्याकडून कॉलेजने रोबोटिक्सवर इंटर्नशिप करून घेतली. या सर्व बाबींचा उपयोग मला मुलाखतीच्या वेळी झाला आणि माझी नोकरीसाठी निवड झाली. संजीवनीमुळे माझे व पालकांचे स्वप्न पूर्ण झाले.
– श्रेयश लोहकणे, विद्यार्थी