स्वातंत्र्याच्या अमृतमहोत्सवी वर्षानिमित्त पुण्यश्लोक अहिल्यादेवी होळकरांचे जन्मस्थान असलेल्या चौंडी (ता. जामखेड) येथील जिल्हा परिषदेच्या शाळेसाठी दोन कोटी तीन लाखांचा निधी शासनाने मंजूर केले आहेत. विधानसभेच्या अधिवेशनात याबाबतची मागणी केली होती. या प्रयत्नांमुळे या शाळेला घसघशीत निधी मंजूर झाला आहे. त्या मागणीला यश आल्याचे आमदार रोहित पवार यांनी दै.'पुढारी'शी बोलताना सांगितले.
महाविकास आघाडी सरकारच्या काळात सन 2022-23चा अर्थसंकल्पीय सादर करताना तत्कालीन अर्थमंत्री अजित पवारांनी महापुरुषांचे जन्मस्थळ किंवा वास्तव असलेल्या ऐतिहासिक गावांमधील शाळा विकसित करण्यासाठी प्रत्येकी एक कोटीचा निधी देण्याची घोषणा केली होती. त्यामध्ये चौंडीच्या शाळेचा समावेश नव्हता. परंतु, चौंडी पुण्यश्लोकअहिल्यादेवी होळकरांचे जन्मस्थळ असून, ही बाब आमदार रोहित पवारांनी अधिवेशनात सरकारच्या निदर्शनास आणून दिली. या मागणीला उत्तर देताना तत्कालीन अर्थमंत्री अजित पवारांनी ही मागणी मान्य केली. त्यानंतर आमदार पवारांनी सांस्कृतिक कार्यकमंत्री सुधीर मुनगंटीवर यांच्याकडे पाठपुरावा केला होता.
एखाद्याने प्रयत्नपूर्वक केलेल्या कामाचे श्रेय घेतले तर काही
हरकत नाही; परंतु न केलेल्या कामाचे श्रेय घेणारे राजकारणी आज खूप दिसत आहेत. आयत्या पिठावर रेघोट्या मारणारे पाहिले की, त्यांची कीव येते. पाठपुराव्याला सकारात्मक प्रतिसाद देऊन हा निधी मंजूर केल्याबद्दल या सरकारचे मनापासून आभार!
– रोहित पवार, आमदार, कर्जत-जामखेड