वांबोरी : पुढारी वृत्तसेवा : वांबोरी बाजारपेठेतील किराणा व्यापारी शैलेंद्र वसंतलाल कटारिया यांच्यावर वांबोरी येथील एका तरुणाने धारदार शस्त्राने हल्ला करून जीवे मारण्याचा प्रयत्न केला. या घटनेचा निषेध म्हणून वांबोरीतून बुधवारी सकाळी दहा वाजता मोर्चा काढून बाजारपेठ बंद ठेवण्यात आली होती. राहुरी तालुक्यातील वांबोरी येथे मंगळवारी रात्री साडेआठच्या दरम्यान वांबोरीतील राहुरी वेस परिसरात राहणार्या एका तरुणाने 'माझ्या मित्राचे कामाचे पैसे तू का देत नाही' असे शैलेंद्र वसंत कटारिया यांना म्हणाला. त्यास शैलेंद्र कटारिया यांनी त्याच्या हमालीच्या पैशाचा आणि तुझा काय संबंध काय? असे कटारीया म्हणाले.
याचा राग आल्यामुळे आरोपीने धारदार सत्तूरच्या साह्याने वार करून कटारिया यांच्यावर प्राणघातक हल्ला करून जिवे मारण्याचा प्रयत्न केला. यामध्ये कटारिया यांना गंभीर दुखापत झाली असून त्यांना तात्काळ अहमदनगर येथील खासगी रुग्णालयात उपचारासाठी दाखल केले. परिस्थितीचे गांभीर्य लक्षात घेऊन राहुरीचे पोलिस निरीक्षक प्रताप दराडे, उपनीरिक्षक सूर्यकांत हांडे यांच्यासह सहाय्यक पोलिस उपनिरीक्षक चंद्रकांत बराटे यांच्यासह पोलिस फोर्स फाटा घटनास्थळी दाखल झाला. संबंधित आरोपीला तात्काळ चौकशीसाठी ताब्यात घेतले. याप्रसंगी जिल्हा परिषद माजी सभापती सुभाष पाटील, जिल्हा परिषदेचे माजी अध्यक्ष बाबासाहेब भिटे, माजी सरपंच नितीन बाफना, किसन जवरे,पोपट देवकर, राजू भराडीया आदी उपस्थित होते.