जवळा : पुढारी वृत्तसेवा : पारनेर जवळा रस्त्यावरील सांगवी सूर्या गावाजवळील नाळी गोटी ओढ्यात सांगवीकडून गांजी भोयरेकडे दुचाकीवर निघालेल्या दोघांचा अपघात झाला. या अपघातात एकाचा जागीच मृत्यू झाला, तर एक जखमी झला आहे. ही घटना रविवारी दुपारी घडली. साडे अकरा वाजण्याच्या सुमारास तुकाराम शंकर माने (वय 47) व विठ्ठल मोहन झंझाड आपल्या दुचाकीवरून सांगवी सूर्यावरून घरी गांजीभोयरेकडे निघाले असता नाळीगोटी ओढ्यावर पावसाने रस्ता वाहून गेल्याने अरुंद रस्त्यावरून त्यांची गाडी जाताना वेगात समोरील वळणावरून आलेल्या वाहनाने खड्डा चुकविण्याच्या नादात माने यांच्या दुचाकीला जोराची धडक दिली.
वाहन धडक देऊन चालक गाडीसह पसार झाला. त्यामुळे अपघात नेमका कसा झाला हे कळू शकले नाही. जोराची धडक बसल्याने तुकाराम माने यांचा जागीच मृत्यू झाला, तर मागे बसलेले विठ्ठल झंझाड गंभीर जखमी झाले. अपघाताची माहिती मिळताच स्थानिकांनी त्यांनी तातडीने दोघांनाही रुग्णालयात उपचारासाठी हलविले; परंतु डॉक्टरांनी तुकाराम माने यांना मृत घोषित केले.