श्रीरामपूर(नगर); पुढारी वृत्तसेवा : मुल्ला कटरची तक्रार मागे घे, जर तक्रार मागे घेतली नाही. तर तुम्हाला मारू, असे म्हणत रॉडने मारहाण करत जखमी करण्याचा प्रकार श्रीरामपूर शहरातील वॉर्ड नं. 1, बोरावके कॉलेजजवळील सिद्धार्थनगर येथे घडला आहे.
याबाबत सिद्धार्थनगर भागात राहणार्या सुलोचना नावाच्या 30 वर्षीय महिलेने पोलिसात फिर्याद दिली आहे.
त्यात म्हटले आहे की, दि. 24 एप्रिलला सायं. 7.30 च्या सुमारास 'मी आमच्या नवी दिल्ली येथे असलेल्या घरी मी व माझा भाचा सोनु गेलो असता, तेथे मनीषा नावाची बाई आली व बंटी हाजी हाही तेथे आला. बंटी हाजी याने मुल्ला कटरची तक्रार मागे घे, जर तक्रार मागे घेतली नाही. आपल्यासह नातेवाईकांना जीवे मारण्याची धमकी दिली.
मी तक्रार मागे घेण्यास नकार दिल्याने बंटी हाजीने माझ्या कानामागे मारली. त्यावेळी सोनू हा पळून जात असतांना जाफर, भैय्या, सलमान, शाहरुख, गुल्लू, शरफ्या बाबा, आशू, रिजवान, अय्याज अशांनी त्याला धरून लाथाबुक्यांनी व काठ्या, दांडे, रॉडने पाठीवर, पायावर, डोक्यावर मारहाण करून जखमी केले.
या महिलेच्या फिर्यादीवरून श्रीरामपूर शहर पोलिसात जाफर, भैय्या, सलमान, शाहरुख, गुल्लू, शरफ्या बाबा, आशू, अय्याज, रिजवान, बंटी हाजी (सर्व रा. श्रीरामपूर) यांच्याविरूद्ध गुन्हा दाखल करण्यात आला आहे. पुढील तपास पोनि गवळी यांच्या मार्गदर्शनाखाली शहर पोलिस करीत आहेत.
दुसरी घटना ही नवीदिल्ली येथेच घडली. याबाबत जिजा राम थोरात (वय 40, रा. नवी दिल्ली, वॉर्ड नं. 2, श्रीरामपूर) या महिलेने दिलेल्या फिर्यादीत म्हटले आहे की, दि. 24 एप्रिल रोजी सायं. 7.30 वा. मी घरी असतांना माझी भावजयी स्वयंपाक करत होती व मी घराच्या दरवाजात बसले होते. तेव्हा माझ्या घराकडे काकर, फिरोज, आशू, गुल्लू, सोफियान, अरबाज (आईचे नाव मुमताज), अरबाज (आईचे नाव सुनीता) हे 'बंटी हाजी हमारे साथ है, तो डरनेकी क्या बात है' अशा घोषणा देत आमच्या घरासमोर आले. तेव्हा त्यांनी जातीवाचक शिवीगाळ केली.
एक महिन्यापासून हे लोक आम्हाला मारण्याची धमकी देत आहेत. माझ्या भावजईचे दात पुढे असल्यामुळे तिला जेसीबी असे म्हणून चिडवून जातीवाचक शिवीगाळ करत मारहाण करून लोटून दिले. तसेच घरातील भांडी फेकून देऊन दमबाजी, आरडाओरड करत चुलीत पाणी ओतत या लोकांनी दहशत निर्माण केली. त्यामुळे मी, माझा भाऊ, भावजयी, तीन भाचे घाबरून घरातून निघून गेलो, असे फिर्यादीत म्हटले आहे. सदर महिलेच्या फिर्यादीवरून पोलिसांनी गुन्हा दाखल केला असून पुढील तपास श्रीरामपूर शहर पोलिस करीत आहेत. या घटनांमुळे खळबळ उडाली आहे.