कोल्हार खुर्द (नगर), पुढारी वृत्तसेवा: राहुरी तालुक्यातील कोल्हार खुर्द येथील भाऊसाहेब नगर मधील एका घरास शॉर्टसर्किटने आग लागून संपूर्ण प्रपंच या आगीत भस्मसात झाल्याची घटना घडली आहे.
कोल्हार खुर्द येथील भाऊसाहेब नगर येथे संतोष धोंडीराम सोनवणे यांचे पत्र्याचे घर असून काल दुपारी दोन ते अडीच वाजण्याच्या सुमारास त्यांच्या राहत्या घरास आग लागल्याचे तेथील रहिवाशांच्या लक्षात आले. संतोष सोनवणे हे त्यांच्या सासुरवाडीला मुंबई येथे एक कार्यक्रमासाठी गेले होते. घरी त्यांचे वडील होते. परंतु हेही शुक्रवारी बाजारसाठी गेल्याने घरी कुणीच नव्हते. दुपारी आग लागून घरातून धूर बाहेर येत असल्याचे शेजार्यांनी पाहिल्यानंतर त्यांनी धावपळ करून आग विझवण्यासाठी प्रयत्न केले. परंतु उन्हाच्या तडाख्यात आग नियंत्रणात न आल्याने संपूर्ण साहित्य त्यात फ्रीज, मोठा एल.इ.डी टी व्ही, कपाट तसेच इतर संसारोपयोगी साहित्य जाळून खाक झाले.
सोनवणे यांचा मंडपचा व्यवसाय असल्याने ते साहित्य जळून खाक झाले. या आगीत जवळपास तीन ते चार लाखांचे नुकसान झाल्याचे समजते. या आगीचे स्पष्ट कारण मात्र समजू शकले नाही. घटनास्थळी कामगार तलाठी मच्छिंद्र राहणे यांनी भेट देऊन पंचनामा केला. यावेळी ग्रामपंचायत सदस्य दीपक शिरसाठ , गोपीनाथ दळे यांच्यासह ग्रामस्थ या ठिकाणी उपस्थित होते.