संगमनेर शहर : पुढारी वृत्तसेवा : संगमनेर तालुक्यातील पानोडी येथे बोगस दवाखाना चालविणारा डॉ. असिम दास याच्या पोलिसांनी मुसक्या आवळल्या. पानोडी येथे बोगस डॉ. असिम दास हा 'मंजुमाता' दवाखाना चालवत होता. त्याच्यावर कारवाई करण्याचे आदेश तालुका आरोग्य अधिकारी यांनी 7 मार्च रोजी आश्वी खुर्द येथिल प्राथमिक आरोग्य केंद्राचे वैद्यकीय अधिकारी कोंडाजी मदने यांना दिले होते. त्यामुळे कारवाईच्या भितीने पळून गेलेल्या बोगस डॉ. असिम दास याच्यावर आश्वी पोलिस ठाण्यात गुन्हा दाखल करण्यात आल्यानंतर पोलिसासह आरोग्य विभागाला गुंगारा देणार्या बोगस डॉक्टरच्या 9 महिन्यानंतर मुसक्या आवळण्यात आश्वी पोलिसांना यश आले आहे. डॉ. मदने यांना याबाबत कारवाई करुन अहवाल सादर करण्याचे आदेश 7 मार्च रोजी दिल्यानंतर डॉ. कोंडाजी मदने हे पानोडी उपकेद्रांचे समुदाय आरोग्य अधिकारी अमोल उगलमुगले यांच्या समवेत पानोडी येथे दवाखाना असलेल्या ठिकाणी गेले होते.
परंतू कारवाई होण्याच्या भितीने आधिच बोगस डॉ. असिम दास याने घटनास्थळाहून पलायन केले होते. यावेळी डॉ. मदने याचा हा दवाखाना एका खासगी घरात असून त्यावर एक फलक लावलेला दिसला. त्या फलकावर 'मंजुमाता दवाखाना' डॉ. असिम दास (निसर्गोपचार) तसेच विविध आजारांची नावे लिहिलेली होती. याबाबत डॉ. मदने यांनी मेडिकल कौसिलकडे याबाबत चौकशी केली असता या व्यक्तीच्या नावे रजिस्ट्रेशन अथवा पदवी आढळून आली नाही. त्यामुळे आश्वी पोलिस ठाण्यात या बोगस डॉक्टर विरुद्ध गुन्हा दाखल करण्यात आला होता.
आरोपी असिम दास हा नगर येथील पारेगाव येथे राहत असल्याची खात्रीशीर माहिती मिळाली होती. त्यामुळे पोलिस उपनिरीक्षक शिवाजी पवार यांना याबाबत कारवाईच्या सुचना देण्यात आल्या होत्या. सूचना मिळताच पोलिस उपनिरीक्षक शिवाजी पवार व पोलिस नाईक हुसेन शेख यांनी पारेगाव येथे जाऊन आरोपी असिम चित्ररंजन दास याच्या मुसक्या अवळत आश्वी पोलिस ठाण्यात हजर केले.