संगमनेर : पुढारी वृत्तसेवा : सामाईक शेतीच्या बांधावरुन दोन कुटुंबात झालेल्या हमरीतुमरीचे पर्यावसान जातीवाचक शिवीगाळ व दमदाटी करण्यात झाले. यातून अनुसूचित जातीच्या महिलेला अपमानास्पद वागणूक देत जीवे मारण्याची धमकी दिल्याप्रकरणी साकूर येथील खंडोबामाळ परिसरातील चौघांवर शिवीगाळ व धमकी देण्यासह अनुसूचित जाती-जमाती अत्याचार प्रतिबंधक कायद्यान्वये (अॅट्रॉसिटी) घारगाव पोलिस ठाण्यात गुन्हा दाखल करण्यात आला आहे.
याबाबत घारगाव पोलिसांनी सांगितले की, मंगळवारी सकाळी 10 वाजेच्या सुमारास सदर महिला मुलासह शेतातील गव्हाच्या पिकाला पाणी भरीत असताना बांधाला- बांध असलेले शेजारी अक्षय सुरेश तमनर, सुरेश तमनर , तान्हाबाई सुरेश तमनर व रोहिणी अक्षय तमनर (सर्व रा.खंडोबामाळ) हे चौघे हातामध्ये कुदळीसह अन्य सामग्री घेवून आले. चौघांनीही काहीएक न सांगता थेट कुदळीने फिर्यादी व स्वतःच्या जमिनीचा सामाईकबांध खोदण्यास सुरुवात केली. अचानक सुरु झालेला हा प्रकार पाहून फिर्यादी महिलेने, 'तुम्ही विनाकारण सामाईक बांध का फोडता?' अशी विचारणा केली.
त्याचा राग धरुन 'त्या' चौघांनी त्यांना व त्यांच्या मुलास शिवीगाळ व दमबाजी करण्यास सुरुवात केली. यामुळे दोन्ही बाजूंनी शाब्दीक बाचाबाची झाल्यामुळे वाद वाढला. हा प्रकार सुरु असतानाच अक्षय सुरेश तमनर याने फिर्यादी महिलेसह मुलाला जातीवाचक शिवीगाळ केली. महिला अनुसूचित जाती-जमा तीची असल्याने त्यांनी तत्काळ या बाबत संगमनेरचे प्रभारी उपविभागीय पोलिस अधिकारी संजय सातव यांना माहिती दिली. त्यांनी फिर्यादीकडून संपूर्ण घटनाक्रम समजावून घेतल्यानंतर त्यांच्या आदेशाने घारगाव पोलिसांनी खंडोबा माळावरील अक्षय सुरेश तमनरसह वडील सुरेश तमनर, आई तान्हाबाई सुरेश तमनर, पत्नी रोहिणी अक्षय तमनर या चौघांविरोधात हाणामारीसह अनुसूचित जाती-जमाती अत्याचार प्रतिबंधक कायद्याच्या (अॅट्रॉसिटी) कलम 3 (1), (आर), 3 (1), (एस), 3 (2), (व्ही. ए) नुसार गुन्हा दाखल केला आहे. या प्रकरणाचा पुढील तपास उपविभागीय पोलीस अधिकारी संजय सातव हे करीत आहेत. या वृत्ताने तालुक्याच्या साकुर पठारभागात पुन्हा एकदा एकच खळबळ उडाली आहे.