संगमनेर(अहमदनगर), पुढारी वृत्तसेवा : संगमनेर तालुक्यातील पठार भागात साकुर परिसरातील शिंदोडी गावात मेंढ्या सांभाळ करण्यास तसेच वेठबिगारीसाठी आणलेल्या नाशिकच्या इगतपुरी तालुक्यातील एका अल्पवयीन मुलीचा मृत्यू झाला. या प्रकरणी घारगाव पोलिसात शिंदोडी येथील पती-पत्नीच्या विरोधात खुनाचा गुन्हा दाखल करून त्यांना अटक केली.
पोलिसांनी दिलेल्या माहितीनुसार, नाशिक जिल्ह्याच्या इगतपुरी तालुक्यातून अनेक अल्पवयीन मुले-मुली संगमनेर तालुक्यासह साकुर जवळील शिंदोडी आणि डिग्रस परिसरात आणले जात आहेत. तेथे त्यांचा शारीरिक छळ करत त्या मुलांकडून मेंढ्या चारण्याचे काम करून घेत होते. नाशिक जिल्ह्याच्या इगतपुरी तालुक्यातील अचानक सहा ते सात मुले गायब झाले असल्याची खळबळजनक बाब समोर आली.
नाशिक जिल्ह्याच्या इगतपुरी तालुक्यातील उभाडे येथील कातकरी वस्तीमधील तुळसाबई सुरेश आगीवले यांनी तीन वर्षांपूर्वी आपली मुलगी गौरी (वय १० वर्ष) हिला घरची परिस्थिती जेमतेम असल्याने मेंढपाळ विकास सीताराम कुदनर याच्याकडे तीन हजार रुपयांच्या मोबदल्यामध्ये पाठवली होती. संशयिताने काही दिवस त्या मुलीला चांगले सांभाळत असल्याचे भासवले. दरम्यानच्या काळात ती बेशुद्ध पडली होती. त्यामुळे कुदनर व त्याच्या साथीदारांनी गौरीला उभाडे येथील आगीवले कुटुंबीयांच्या घराजवळ सोडून पलायन केले.
आपल्या घराजवळकोण झोपले आहे हे पाहण्यासाठी तुळसाबाई गेल्या असता त्यांना आपलीच मुलगी बेशुद्ध अवस्थेत आढळून आली. त्यानंतर तात्काळ तीला रुग्णालयात उपचारासाठी दाखल केले. मात्र उपचारा दरम्यान तीचा मृत्यू झाला.
तुळसाबाई सुरेश आगिविले यांनी याबाबत घारगाव पोलिसांत विकास कुदनर व त्याची पत्नी सुमन विकास कुदनर यांच्या विरोधात खुनाचा गुन्हा दाखल केला आहे. तक्रारीनंतर पोलिसांनी त्या दोघांनाही अटक केली आहे. मात्र या प्रकरणातील मुख्य एजंट मात्र फरार आहे. याबाबत पुढील तपास पोलीस करत आहेत.
हेही वाचा