संगमनेर; पुढारी वृत्तसेवा : संगमनेर तालुक्यातील विविध रस्त्यांसाठी काँग्रेस विधिमंडळ पक्षनेते आ. बाळासाहेब थोरात यांच्या माध्यमातून अर्थसंकल्पातून 86 कोटी 27 लाख रुपयांचा निधी मिळाला. मुख्यमंत्री ग्रामसडक योजना टप्पा दोनमधून 14 कोटी 48 लाख रुपयांचा निधी मंजूर झाल्याची माहिती थोरात कारखान्याचे संचालक इंग्रजीत थोरात यांनी दिली.
थोरात म्हणाले की, अर्थसंकल्पातून राज्यमार्गाकरता 8 कोटी, प्रजीमासाठी 30 कोटी तर अनेक दिवस मंजुरी होऊनसुद्धा तांत्रिक मान्यतेस रखडलेल्या तालुक्यातील नान्नज दुमाला, सोनोशी, मालदाड या रस्त्यासह गुंजाळवाडी, राजापूर, दरेवाडी, कवठेमलकापूर रस्त्यांसाठी 33 कोटी 79 लाख रुपयांची तांत्रिक मंजुरीसाठी विधानसभेत लक्षवेधी केल्याने ग्रामविकास मंत्र्यांनी तातडीने मंजुरी देण्याचे मान्य केले आहे.
मुख्यमंत्री ग्रामसडक योजना टप्पा दोन जिल्हा वार्षिक योजनेंतर्गत तळेगाव दिघे ते तालुका हद्द सायाळे या 3 किलो मीटर रस्त्यासाठी 2 कोटी 45 लाख रुपये, राष्ट्रीय महामार्ग 50 कोल्हेवाडी ते जोर्वे या 4 किलो मीटर रस्त्यासाठी 3 कोटी 11 लाख रुपये, पिंपारणे ते कोळवाडे- शिरापूर या साडेसहा किलो मीटर रस्त्यासाठी 5 कोटी 19 लाख रुपये तर राजापूर ते राष्ट्रीय महामार्ग चिखली या साडेतीन किलो मीटरच्या रस्त्यासाठी 3 कोटी 73 लाख रुपये असे एकूण 14 कोटी 48 लाख रुपये मंजूर झाले आहेत.
या विविध रस्त्यांना तांत्रिक मान्यता मिळाली नाही. पावसाळ्यापूर्वी हे कामे सुरू होणार असल्याने तालुक्यात रस्त्यांचे मजबुतीकरण व डांबरीकरण होणार असल्याने दळण-वळणाचे जाळे निर्माण होत आहे. या नवीन रस्त्यांच्या कामांसाठी सातत्याने पाठपुरावा करून निधी मिळविल्याबद्दल आ. थोरातांचे नागरिकांनी आभार मानले.