परफ्यूमचा सुगंध जितका खास असतो, तितकाच त्याचा साठवण्याचा पद्धतही महत्त्वाची असते. बाजारात तुम्ही पाहिलं असेल की जवळजवळ सर्व परफ्यूम काचेच्या बाटलीतच ठेवलेले असतात. प्लास्टिक, स्टील किंवा अॅल्युमिनियमऐवजी काच का वापरतात, हा प्रश्न अनेकांना पडतो. यामागे केवळ सौंदर्य किंवा महागडं दिसणं हे कारण नसून, परफ्यूमचा सुगंध आणि त्याची गुणवत्ता टिकवण्यासाठी काही वैज्ञानिक कारणे देखील आहेत.
परफ्यूम तयार करताना विविध आवश्यक तेलं, अल्कोहॉल आणि सुगंधी घटक वापरले जातात. हे घटक अतिशय नाजूक आणि संवेदनशील असतात. प्लास्टिकच्या भांड्यात हे घटक रासायनिक प्रतिक्रिया देऊ शकतात. त्यामुळे परफ्यूमचा मूळ सुगंध बदलू शकतो आणि त्याची गुणवत्ता कमी होऊ शकते. काच मात्र पूर्णपणे नॉन-रिअॅक्टिव्ह असल्याने परफ्यूममधील सुगंधी घटक सुरक्षित राहतात.
काच परफ्यूममधील अल्कोहॉल किंवा आवश्यक तेलांशी मिसळत नाही. जर परफ्यूम प्लास्टिकमध्ये भरला गेला तर काही दिवसांत त्याचा सुगंध फिका होऊ लागतो. काच सुगंधाचे रेणू आतमध्ये जपून ठेवते आणि परफ्यूमची टिकाऊ क्षमता वाढवते. म्हणूनच ब्रँडेड आणि उच्च गुणवत्तेचे परफ्यूम कायम काचेच्या बाटल्यांमध्येच पॅक केले जातात.
काचेच्या बाटल्यांचे आणखी एक महत्त्वाचे वैशिष्ट्य म्हणजे त्या उष्णता आणि प्रकाशापासून संरक्षण देतात. सूर्यप्रकाश किंवा तापमान वाढले की परफ्यूममधील सुगंधी घटक खराब होऊ शकतात. त्यामुळे अनेक परफ्यूम बाटल्या रंगीत काचेच्या असतात जसे निळे, काळे किंवा ब्राउन शेड्स. यामुळे परफ्यूमचे ऑक्सिडेशन कमी होते आणि सुगंध दीर्घकाळ टिकून राहतो.
तसेच काचेच्या बाटल्यांना एक प्रीमियम आणि आकर्षक लूक मिळतो. परफ्यूम हा केवळ सुगंध नसून एक लक्झरी प्रॉडक्ट मानला जातो. त्यामुळे काचेच्या बाटलीत तो अधिक मोहक दिसतो. काच अधिक टिकाऊ असल्याने फवारणी करणारा पंप (स्प्रे) देखील चांगल्या प्रकारे फिट बसतो, ज्यामुळे परफ्यूमचे स्प्रे मऊ आणि समसमान येते.
एकंदरीत, परफ्यूमला काचेच्या बाटलीत ठेवण्यामागे तीन प्रमुख कारणे आहेत. सुगंधाची शुद्धता, सुरक्षितता आणि टिकाऊपणा. प्लास्टिकमध्ये ठेवले तर परफ्यूम खराब होण्याची शक्यता वाढते. त्यामुळे परफ्यूम उद्योगात काचेच्या बाटल्या ही सर्वात सुरक्षित आणि योग्य निवड मानली जाते.