कोडोली : पुढारी वृतसेवा : अभ्यासासाठी नोटस्ची झेरॉक्स काढून येताना भरधाव वाहनाने मोटारसायकलला जोरदार धडक दिल्याने नर्सिंग कॉलेजचा अभिषेक राजेंद्र कासुळे (वय 21, रा. भालगाव, ता. पाथर्डी, जि. अहमदनगर) हा विद्यार्थी जागीच ठार झाला; तर ओंकार संदीप गावंडे (वय 22, रा. सातारा, सध्या रा. दोघे बोरपाडळे, ता. पन्हाळा) हा विद्यार्थी गंभीर जखमी झाला.
हा अपघात सोमवारी रात्री साडेअकराच्या दरम्यान कोडोली- बोरपाडळे रस्त्यावर घडला. बोरपाडळे येथील नर्सिंग कॉलेजमधील दुसर्या वर्षामध्ये अभिषेक कासुळे शिकत होता. त्याच्याच वर्गातील ओंकार गावंडे हे दोघे कोडोली येथून झेरॉक्सच्या प्रती काढून परतत असताना हा अपघात झाला.
कोडोली-बोरपाडळे रस्त्यावरील शिवम हॉटेलसमोर अज्ञात वाहनाने त्यांना जोरदार धडक दिली. यामुळे अभिषेक व ओंकार हे दोघेजण सुमारे 30 फूट रस्त्यावरून फरफटत गेल्याने अभिषेक डोक्याला जबर मार लागून जागीच ठार झाला.