मुंबई; पुढारी वृत्तसेवा : अंधेरी पूर्व विधानसभा पोटनिवडणुकीत बाळासाहेबांची शिवसेना व भाजप युतीचे उमेदवार मुरजी पटेल यांची उमेदवारी धोक्यात आली आहे. शनिवार 15 ऑक्टोबर रोजी उमेदवारी अर्जाची छाननी करताना पटेल यांच्यावर असलेले विविध गुन्हे व महापालिका निवडणूक लढवताना दिलेले जातीचे बनावट प्रमाणपत्र याचा उल्लेख पटेल यांनी केला नसल्यामुळे शिवसेनेने आक्षेप नोंदवला. निवडणूक आयोगाचे शिवसेनेकडून लक्ष वेधून यावेळी आक्षेपही घेण्यात आला.
मुंबई महानगरपालिकेच्या फेब्रुवारी 2017 मध्ये झालेल्या निवडणुकीत प्रभाग क्रमांक 81 मधून मुरजी पटेल, तर प्रभाग क्रमांक 76 मधून त्यांच्या पत्नी केशरबेन पटेल निवडून आल्या होत्या. पण या निवडणुकीमध्ये त्यांनी जातीचे बनावट प्रमाणपत्र सादर केल्याची तक्रार काँग्रेस व शिवसेनेने केली होती. अखेर पटेल पती-पत्नीचे नगरसेवक पद रद्द करण्यात आले होते, तर त्यांच्या जागी दुसर्या क्रमांकाची मते मिळवलेले काँग्रेसचे नितीन सलागरे व शिवसेनेचे संदीप नाईक यांना नगरसेवक म्हणून घोषित करण्यात आले होते. हाच दाखला देत शिवसेनेचे संदीप नाईक यांनी आता मुरजी पटेल यांच्या उमेदवारी अर्जावर आक्षेप घेतला आहे. एवढेच नाही तर, पटेल यांच्यावर अनेक गुन्हे दाखल असल्याकडेही नाईक यांनी लक्ष वेधले आहे. त्यामुळे पटेल यांची उमेदवारी धोक्यात येऊ शकते.