लोणंद (जि. सातारा) : पुढारी वृतसेवा – माऊलींच्या पालखी सोहळ्याला भक्तीमय वातावरणात लोणंदकर नागरिकांनी निरोप दिला. लोणंद येथील अडीच दिवसाचा मुक्काम आटोपून आज दुपारी १ च्या सुमारास तरडगावकडे मार्गस्थ झाला. माऊलीला निरोप देताना ग्रामस्थांनी माऊलींच्या रथावर पुष्पवृष्टी केली.
रस्त्याच्या दोन्ही बाजूच्या इमारतीवरून नागरिक रथावर पुष्पवृष्टी करत होते. अत्यंत भक्तीपूर्ण व भावपूर्ण वातावरणात माऊलीचा पालखी सोहळा गांधी चौक, शास्त्री चौक, स्टेशन चौक मार्गे फलटण पुलावरून मार्गस्थ झाला. ज्ञानेश्वर माऊली तुकारामाच्या जयघोषाने आणी आणि टाळ-मृदंगाच्या गजरात लोणंदनगरी डुंबून गेली होती. अडीच दिवसाच्या कालावधीत माऊलीच्या दर्शनासाठी लागलेल्या रांगा शेवटपर्यंत सुरू होत्या. भाविकांचा महापूर शेवटपर्यंत तसाच सुरू होता. माऊलीच्या पालखी सोहळ्याला लोणंदकरांनी भावपूर्ण वातावरणात निरोप दिला.