पिंपरी; पुढारी वृत्तसेवा : पीएमपीएमएल बसचे कंडक्टर आणि प्रवशाचा आपसात वाद झाला. त्यानंतर चालकाने बस थेट पोलीस ठाण्यात नेली. त्यामुळे सर्व प्रवाशांना ताटकळत बसावे लागले. ही घटना सकाळी मोशी येथे घडली. पोलिसांनी दिलेल्या माहितीनुसार, एका प्रवशाने मोशीपर्यंतचे पंधरा रुपयांचे तिकीट काढले. त्यानंतर त्याने पुन्हा एक दिवसाचा पन्नास रुपयांचा पास मागितला.
मात्र, गैरसमजातून कंडक्टरने पुन्हा मोशीपर्यंतचे तिकीट दिले. या कारणावरून दोघांमध्ये वाद सुरू झाला. या वादाचे रूपांतर हाणामारी पर्यंत गेले. शेवटी भांडण मिटत नसल्याचं पाहून चालकाने बस मोशी पोलीस चौकीत नेली. तेथे पोलीस उपस्थित नसल्याने शेवटी बस भोसरी एमआयडीसी पोलीस ठाण्यात आणण्यात आली. त्यामुळे अन्य प्रवाशांना तासाभर ताटकळत बसावे लागले.