मुंबई : पुढारी वृत्तसेवा पवई भागात एअर होस्टेसची हत्या करणाऱ्या आरोपीने लॉकअपमध्येच जीवन संपवल्‍याची धक्कादायक घटना समोर आली आहे. मुंबईतील अंधेरी परिसरात असलेल्या पोलीस स्टेशनच्या लॉकअपमध्येच गळफास घेत त्याने आयुष्य संपवलं. पवई येथे राहणाऱ्या रुपल आग्रे नावाच्या ट्रेनी एअर होस्टेसच्या हत्येप्रकरणी पोलिसांनी विक्रम अटवाल याला अटक केली होती.
आरोपी विक्रम अटवाल याने पँटचा सहाय्याने गळफास लावून घेतला. आज (शुक्रवारी) सकाळी साडेसहा वाजण्याच्या सुमारास हा प्रकार घडला. सफाई कामगार असलेल्या विक्रमने दोन दिवसांपूर्वी रुपल आग्रे हिची गळा चिरुन हत्या केली होती.
पवई येथे राहणाऱ्या रुपल आग्रे नावाच्या एअर होस्टेसच्या हत्येप्रकरणी पोलिसांनी विक्रमला अटक केली होती. पोलिसांनी त्याला न्यायालयात हजर केल्यानंतर आठ सप्टेंबरपर्यंत त्याला पोलीस कोठडी सुनावण्यात आली होती. मात्र आज सकाळीच त्याने आपल्या पँटने गळफास घेत आत्महत्या केली. त्याच्या आत्महत्येचं नेमकं कारण अद्याप अस्पष्ट आहे.
काय आहे प्रकरण?
रुपल ओग्रे ही एअर इंडियामध्ये एअर होस्टेसचे प्रशिक्षण घेत होती. ती मूळची छत्तीसगडमधील रायपूर जिल्ह्यातील रहिवासी होती. एप्रिल महिन्यातच ती मुंबईत आली होती. मुंबईत रुपल मरोळ येथील टाटा पॉवर सेंटर बस स्थानकाजवळील कृष्णलाल मारवाह मार्गावरील एनजी कॉम्प्लेक्समध्ये असलेल्या फ्लॅटमध्ये भाड्याने राहत होती. ती तिची बहीण आणि तिच्या मित्रासोबत राहत होती. रुपलची बहीण आणि तिचा मित्र आठ दिवसांपूर्वी मुंबईहून रायपूरला गेले होते.
रूपल रविवारी सकाळी व्हॉट्सअप व्हिडिओ कॉलद्वारे तिच्या कुटुंबाशी बोलली होती. यानंतर तिचा मोबाईल बंद लागत होता. कुटुंबीयांना मुलीची काळजी वाटू लागली, म्हणून त्यांनी तिच्या काही मित्रांना फोन केला. तिच्या एका मित्राने घटनास्थळ गाठलं, तेव्हा त्याला रूपलच्या फ्लॅटला कुलूप दिसले. त्याने सोसायटीला याबाबत माहिती दिली, त्यानंतर पोलिसांना माहिती देण्यात आली. पोलिसांनी डुप्लिकेट चावीने दरवाजा उघडला असता, रुपल त्यांना मृतावस्थेत आढळून आली. रुपलचा गळा चिरून तिचा खून करण्यात आला होता.
रुपलवर विक्रमची वाईट नजर होती, असे सूत्रांचे म्हणणे आहे. सोसायटीत साफसफाई करताना त्याने यापूर्वीही तिच्याशी गैरवर्तणूक केली होती. रूपलच्या फ्लॅटमध्ये कचरा गोळा करण्यासाठी तो अनेकदा जात असे. रविवारी रुपल डस्टबिन घेण्यासाठी खोलीत गेली असता, विक्रमही तिच्या मागे खोलीत गेला. या प्रकारावर रूपलने आक्षेप घेतला असता, विक्रमने तिला सांगितले की, तो तिच्या प्रेमात पडला आहे. यावर रुपलने विक्रमला चांगलेच फटकारले. याचा राग येऊन विक्रमने हत्या केल्याचा आरोप आहे.
सीसीटीव्ही फुटेज, कॉम्प्लेक्समध्ये काम करणाऱ्या इतर व्यक्ती, वैद्यकीय तपासणी आणि तांत्रिक मदत या सर्व बाबींची पूर्तता करत पोलिसांनी विक्रमला अटक केली होती. आता त्याने पोलीस कोठडीतच पँटने गळफास घेत जीवन संपवल्‍याचे समोर आले आहे.
हेही वाचा :