पुढारी ऑनलाईन डेस्क : FIFA WC Footballer : फिफा विश्वचषक स्पर्धा सुरू होण्यास अवघे काही तास उरले आहेत. या स्पर्धेचे आज (20 नोव्हेंबर) बिगुल वाजणार असून पहिल्या सामन्यात यजमान कतार (qatar) आणि इक्वेडोर (ecuador) पहिल्या सामन्यात आमनेसामने असतील. अरब देशांमध्ये खेळला जाणारा हा पहिला फिफा विश्वचषक आहे. यंदाच्या स्पर्धेत 32 संघ सहभागी असून त्यांची 8 गटात विभागणी करण्यात आली आहे. प्रत्येक गटात 4 संघ आहेत. प्रत्येक गटातील दोन संघ बाद फेरीत म्हणजेच राउंड ऑफ 16 मध्ये पोहोचतील. चला तर विश्वचषक सुरू होण्याआधी, जाणून घेऊया या स्पर्धेतील सर्वात तरुण, सर्वात वयस्कर, सर्वात उंच आणि सर्वात लहान खेळाडूंविषयी रंजक माहिती…
जर्मन संघ विश्वचषक जिंकण्याच्या प्रमुख दावेदारांपैकी एक आहे. संघात युवा आणि अनुभवी खेळाडूंचा उत्तम मिलाफ आहे. मात्र, संघात असे दोन खेळाडू आहेत ज्यांच्यावर सर्वांच्या नजरा खिळल्या आहेत. यामध्ये 18 वर्षीय जमाल मुसियाला आणि 17 वर्षीय युसूफ मुकोको (Youssoufa Moukoko) यांचा समावेश आहे. यंदाच्या फिफा विश्वचषकात युसूफ हा सर्वात तरुण खेळाडू आहे. सध्या तो जर्मनीचा उगवता स्टार मानला जात आहे. या मोसमातील बुंडेस्लिगामधील त्याचे रेकॉर्ड प्रभावी ठरले आहे. बोरुसिया डॉर्टमंडकडून खेळताना युसूफने सहा गोल केले आहेत आणि तीन असिस्ट केले आहेत. युसूफने आपल्या कामगिरीने जर्मन व्यवस्थापक हॅन्सी फ्लिकचे लक्ष वेधून घेतले. स्टार फुटबॉलपटू टिमो वर्नर दुखापतीने बाहेर पडल्यानंतर युसुफाचा जर्मन संघात समावेश करण्यात आला होता. (FIFA WC Footballer Interesting information)
कतारमधील फिफा विश्वचषकात (qatar fifa world cup) अनेक संघांनी आपल्या संघात अनुभवी खेळाडूंचा समावेश केला आहे. यामध्ये 39 वर्षीय डॅनी अल्वेस (ब्राझील), 38 वर्षीय टियागो सिल्वा (ब्राझील), 37 वर्षीय लुका मॉड्रिक (क्रोएशिया) आणि 37 वर्षीय स्टार ख्रिस्तियानो रोनाल्डो (पोर्तुगाल) यांचा समावेश आहे. मात्र, मेक्सिकोचा गोलकीपर अल्फ्रेडो तालावेरा (Alfredo Talavera) हा या विश्वचषक स्पर्धेतील सर्वात वयस्कर खेळाडू आहे. अल्फ्रेडो 40 वर्षांचा आहे. तो एफसी जुआरेझसाठी क्लब स्तरावर खेळतो. अल्फ्रेडो विश्वचषकातील दिग्गज फुटबॉलपटूंपैकी एक आहे. त्याचा सहकारी गोलरक्षक गिलेर्मो ओचोआही 37 वर्षांचा आहे. (FIFA WC Footballer Interesting information)
मोरोक्को संघ 'ग्रुप एफ'मध्ये आहे. या गटात बेल्जियम कॅनडा, क्रोएशिया या संघांचा समावेश आहे. पण मोरोक्कन संघ या गटात यंदा मोठा अपसेट घडवू शकतो. मोरोक्को संघाची जबाबदारी 10 नंबरची जर्सी परिधान करणा-या इलियास कीरच्या हाती असेल. कमी उंची असूनही समोरच्या संघाला चकित करण्यात हा स्टार माहिर आहे. मैदानावरील त्याचा वेग आणि कौशल्य पाहण्यासारखे आहे. क्लब स्तरावर इलियासची कामगिरी प्रभावी ठरली आहे. त्याने इंग्लिश चॅम्पियनशिप लीगमध्ये क्लब क्यूपीआर (QPR) सोबत या हंगामात तीन गोल केले आणि सहा असिस्टे केले आहेत. (FIFA WC Footballer Interesting information)
नेदरलँडचा गोलकीपर अँड्रियास (Andries Noppert) हा कतार येथील फिफा विश्वचषकातील सर्वात उंच खेळाडू आहे. तो लुई व्हॅन गालच्या संघात प्रवेश करण्यात यशस्वी झाला. हीरेनवीन क्लबसाठी त्याची कामगिरी प्रभावी होती. त्याने 14 सामन्यांत सहा उत्कृष्ट सेव्ह केले. नेदरलँडचा संघ या प्रतिभावान गोलरक्षकावर अवलंबून असेल. तो नेदरलँडकडून खेळताना क्लबमधील आपल्या लक्षवेधी कामगिरीची पुनरावृत्ती करेल अशी संघ सहका-यांसह चाहत्यांना अपेक्षा आहे. (FIFA WC Footballer Interesting information)
अर्जेंटिनाचा कर्णधार आणि या विश्वचषकातील स्टार खेळाडूंपैकी एक असलेला लिओनेल मेस्सीकडे (leonardo messi) यंदा सर्वांचे लक्ष लागले आहे. हा त्याचा शेवटचा विश्वचषक आहे. अशा परिस्थितीत तो अर्जेंटिनाला विश्वचषकाची तिसरी ट्रॉफी जिंकून देण्यासाठी सर्वतोपरी प्रयत्न करेल. 2006 फिफा विश्वचषक स्पर्धेत मेस्सी पहिल्यांदा खेळला. यंदाचा कतारमधील त्याची ही पाचवी विश्वचषक स्पर्धा आहे. फिफा विश्वचषक स्पर्धेत सर्वाधिक 19 सामने खेळण्याचा विक्रमही त्याच्या नावावर आहे. तसेच, त्याने आपल्या देशासाठी सर्वाधिक सामने खेळले आहेत. मेस्सीने अर्जेंटिनासाठी 165 सामने खेळले असून 91 गोल केले आहेत.
जर्मनीचा स्टार फॉरवर्ड थॉमस मुलर (thomas muller) कतारमधील विश्वचषकात भाग घेणाऱ्या खेळाडूंमध्ये सर्वाधिक गोल आणि असिस्ट करण्यात आघाडीवर आहे. या स्पर्धेत त्याच्या नाववर आतापर्यंत 10 गोलची नोंद असून सहा गोलमध्ये त्याने असिस्ट केले आहे. जर्मन संघात थॉमसला रेडिओ म्युलर या नावानेही ओळखले जाते. हा खेळाडू मैदानावर अतिशय हुशारीने प्रतिस्पर्धी संघाच्या बचावपटूंना चकवा देत गोल जाळे भेदतो. 2014 मध्ये जेव्हा जर्मन संघाने फिफा विश्वचषक जिंकला तेव्हा म्युलरने त्यात महत्त्वाची भूमिका बजावली होती. त्याच वर्षी त्याला सिल्व्हर बॉल अवॉर्डही प्रदान करण्यात आला होता. जेव्हा संघाला गोलची गरज असते तेव्हा म्युलर हा एकमेव पर्याय असतो. त्यामुळे जर्मन संघाची त्याच्यावर भिस्त असणार यात शंका नाही.