पुढारी ऑनलाईन डेस्‍क : यंदाच्‍या एकदिवसीय विश्वचषक स्‍पर्धेत इंग्लंडच्या संघाने क्रिकेटप्रमीची निराशा केली. या संघाची स्‍पर्धेतील कामगिरी अत्‍यंत सुमार ठरली. याची गंभीर दखल घेत इंग्लंडच्या निवड समितीने वेस्ट इंडिज दौऱ्यासाठी विश्वचषक संघातील ९ खेळाडूंना बाहेरचा रस्‍ता दाखवला आहे. ( England Announce Squad For West Indies Tour )
इंग्लंड आणि वेल्स क्रिकेट बोर्डाने (ECB) वेस्ट इंडिजच्या आगामी मर्यादित षटकांच्या दौऱ्यासाठी संघाची घोषणा केली आहे. गतविजेत्या T20 विश्वविजेत्या संघाला 3 डिसेंबरपासून तीन एकदिवसीय सामने आणि पाच T20 आंतरराष्ट्रीय सामने खेळायचे आहेत. इंग्लंडचा कॅरेबियन दौरा 3 डिसेंबरपासून सुरू होत असून हे सामने 21 डिसेंबरपर्यंत खेळवले जाणार आहेत.
निवड समितीने एकदिवसीय मालिकेसाठी १५ सदस्यीय इंग्लंड संघाची घोषणा केली आहे, टी-20 संघात 16 खेळाडूंचा समावेश आहे. वेगवान गोलंदाज जोश टॉंग आणि जॉन टर्नर यांना एकदिवसीय आणि टी-20 दोन्ही संघात स्थान मिळाले आहे. भारतातील सध्याच्या विश्वचषक इंग्लिश संघाचे एकूण सहा खेळाडू कॅरेबियन दौऱ्याचा भाग असणार आहेत. विश्वचषक स्‍पर्धेत निराशाजनक कामगिरी करणार्‍या जॉनी बेअरस्टो, जो रूट आणि मार्क वुड या ऑफ फॉर्म खेळाडूंना दोन्ही संघात स्थान मिळाले नाही, तर डेव्हिड विलीने नुकतीच आंतरराष्ट्रीय क्रिकेटमधून निवृत्ती जाहीर केली आहे.
नुकत्‍याच झालेल्‍या विश्‍वषक स्‍पर्धेनंतरही इंग्लंडने जोस बटलरला कर्णधारपदी कायम ठेवले आहे. विश्वचषक लीग टप्प्यात सातव्या स्थानावर राहिल्यानंतर कर्णधार आणि मर्यादित षटकांचे प्रशिक्षक मॅथ्यू मॉट यांच्यावर प्रचंड दबाव आहे. त्याच्या देखरेखीखाली हा संघ 2025 च्या चॅम्पियन्स ट्रॉफीसाठी केवळ पात्र ठरला आहे. पाकिस्तानविरुद्धचा सामना इंग्लंडसाठी आपला शेवटचा सामना असू शकतो, असे नुकतेच जाहीर करणाऱ्या डेव्हिड मलानला दोन्ही संघात स्थान मिळाले नाही.
इंग्लंड संघात मोईन अली, ख्रिस वोक्स, रीस टोपली आणि आदिल रशीद यांसारख्या वरिष्ठ खेळाडूंना एकदिवसीय संघात स्थान मिळालेले नाही;परंतु ते T20 संघाचा भाग आहेत. इंग्लंडच्या वेस्ट इंडिज दौऱ्याची सुरुवात एकदिवसीय मालिकेने होणार आहे. 12 डिसेंबरपासून ब्रिजटाऊन, सेंट जॉर्ज आणि तारुबा येथे पाच सामन्यांच्या टी-20 मालिकेला सुरुवात होईल.
2022 मध्ये कॅरेबियन भूमीवर उभय संघांमधील टी-20 मालिका खेळली गेली. वेस्ट इंडिजने पाच सामन्यांची मालिका 3-2 अशा फरकाने जिंकली होती आणि पाचव्या आणि शेवटच्या T20 आंतरराष्ट्रीय सामन्यात मालिका निर्णायक दिशेने जात होती.
इंग्लंडचा वन-डे संघ : जोस बटलर (कर्णधार), रेहान अहमद, गुस ऍटकिन्सन, हॅरी ब्रूक, ब्रायडन कार्स, जॅक क्रॉ, सॅम करन, बेन डकेट, टॉम हार्टले, विल जॅक्स, लियाम लिव्हिंगस्टोन, ऑली पोप, फिल सॉल्ट, जोश टंग आणि जॉन टर्नर .
इंग्लंडचा T-20 संघ : जोस बटलर (कर्णधार), रेहान अहमद, मोईन अली, गुस ऍटकिन्सन, हॅरी ब्रूक, सॅम कुरन, बेन डकेट, विल जॅक, लियाम लिव्हिंगस्टोन, टायमल मिल्स, आदिल विरशीद, फिल सॉल्ट, जोश टंग, रीस टोपली, जॉन टर्नर आणि ख्रिस वोक्स.