पुढारी ऑनलाईन डेस्क : बर्मिंगहॅम कॉमनवेल्थ गेम्सचा दुसरा दिवस भारतासाठी अतिशय प्रेक्षणीय ठरला. या दिवशी भारताला एक सुवर्ण, दोन रौप्य आणि एक कांस्य अशी एकूण चार पदके मिळाली. भारताला ही सर्व पदके वेटलिफ्टिंगच्या विविध स्पर्धांमध्ये मिळाली. दोन पदके पुरुष खेळाडूंनी तर दोन महिला खेळाडूंनी जिंकली. संकेत सरगरने भारतासाठी पदक जिंकण्याची सुरुवात केली. त्याने पुरुषांच्या 55 किलो गटात रौप्यपदक जिंकले. त्यानंतर गुरुराज पुजारीने पुरुषांच्या 61 किलो गटात कांस्यपदक जिंकून भारताची पदकतालिका दुप्पट केली.
यानंतर महिला वेटलिफ्टर्सनी दंड थोपटले. भारताची स्टार वेटलिफ्टर मीराबाई चानूने 22 व्या राष्ट्रकुल क्रीडा स्पर्धेत भारताला पहिले सुवर्णपदक मिळवून दिले. तिने 49 किलो वजनी गटात एकूण 201 किलो वजन उचलून तिरंगा फडकावला. यानंतर बिंद्याराणी देवीने महिलांच्या 55 किलो गटात एकूण 202 किलो वजन उचलून रौप्यपदक जिंकले.
23 वर्षीय बिंद्याराणी देवीचे पूर्ण नाव बिंद्याराणी देवी सोरखाईबाम आहे. 27 जानेवारी 1999 रोजी मणिपूर येथे जन्मलेल्या बिंद्याराणी हिने अगदी लहान वयातच दक्षिण आशियाई खेळ 2019, जागतिक युवा चॅम्पियनशिप 2016, जागतिक वेटलिफ्टिंग चॅम्पियनशिप 2021 यासह अनेक मोठ्या वेटलिफ्टिंग स्पर्धांमध्ये भारताचे प्रतिनिधित्व केले. 2019 मध्ये सामोआ येथे झालेल्या कॉमनवेल्थ वेटलिफ्टिंग चॅम्पियनशिपमध्ये बिंद्याराणी देवीने क्लीन आणि जर्क स्पर्धेत सुवर्ण पदक आणि 2021 मध्ये ताश्कंद येथे झालेल्या कॉमनवेल्थ वेटलिफ्टिंग स्पर्धेत रौप्य पदक जिंकले.
चानूप्रमाणेच बिंद्याराणीही मणिपूरची रहिवासी आहे. तिने 2019 मध्ये कॉमनवेल्थ चॅम्पियनशिपमध्ये सुवर्ण आणि 2021 च्या स्पर्धेत रौप्यपदक पटकावले. किराणा दुकानाची मालकी असलेल्या शेतकऱ्याची मुलगी, बिंद्याराणी 2008 ते 2012 पर्यंत तायक्वांदो खेळायची. पण उंची कमी असल्यामुळे तिने वेटलिफ्टिंग खेळाला प्राधान्य दिले.