पुढारी ऑनलाईन डेस्क : Electricity Bill Hike : बिहारमधील नितीश कुमार सरकारने जनतेला मोठा धक्का दिला आहे. बिहार वीज नियामक आयोगाने वीज दरात वाढ करण्याचा निर्णय घेतला आहे. बिहार वीज नियामक आयोगाच्या नवीन दरांनुसार बिहारमधील नवीन विजेच्या दरात 24 टक्क्यांनी वाढ करण्यात आली आहे.
वीज नियामक आयोगाचे अध्यक्ष शिशिर सिन्हा यांनी गुरुवारी पाटणा येथे वीज बिलाच्या शुल्कात वाढ करण्याची घोषणा केली. वीज दरात 24.10 टक्के वाढ करण्याचा निर्णय आयोगाने घेतला असल्याचे त्यांनी स्पष्ट केले. नवीन दर लागू झाल्यानंतर बिहारमध्ये विजेच्या दरात किमान दोन रुपयांनी प्रति युनिट वाढ होण्याची शक्यता आहे. म्हणजे महिन्याभरात 100 युनिट वीज वापरल्यास 150 ते 200 रुपये जास्त मोजावे लागतील. (Electricity Bill Hike)
केवळ विजेचे दर वाढवले आहेत असे नाही, तर विजेच्या दरांसोबतच निश्चित शुल्कातही लक्षणीय वाढ करण्यात आली आहे. निश्चित शुल्क दुप्पट करण्याचा निर्णय घेण्यात आला आहे. निश्चित शुल्कात वाढ करण्याच्या आयोगाच्या निर्णयानंतर लोकांना 1.25 पट अधिक वीज बिल भरावे लागणार आहे. (Electricity Bill Hike)
आयोगाचा हा निर्णय 1 एप्रिल 2023 पासून लागू होणार आहे. मात्र, नवीन वीज दर आणि नवीन दराचा निर्णय सरकारच्या अनुदानाच्या निर्णयावर अवलंबून असेल. बिहार सरकार विजेवर सबसिडी देते. सध्या नितीश कुमार सरकार एक रुपया 83 पैसे सबसिडी देते. जर सरकारने ही सबसिडी वाढवली तर वीजबिल वाढण्याच्या निर्णयाचा जनतेवर तितकासा परिणाम होणार नाही, जर ती वाढली नाही तर लोकांना आपले नुकसान सहन करावे लागेल, असे काहींचे म्हणणे आहे.