पुढारी ऑनलाईन डेस्क : मिचेल मार्शची झंझावती १७५ धावांची खेळी. त्याला डेव्हिड वॉर्नर आणि स्‍टीव्‍हन स्‍मिथ यांच्‍या अर्धशतकी खेळीची साथ या जाेरावर ऑस्‍ट्रेलियाने आज (दि.११) बांगला देशवर ८ गडी राखून दणदणीत विजय मिळवला. ऑस्‍ट्रेलियाने एकदिवसीय विश्‍वचषक स्‍पर्धेच्‍या उपांत्‍य फेरीत यापूर्वीच धडक मारली आहे.
ऑस्ट्रेलियाचा कर्णधार पॅट कमिन्सने नाणेफेक जिंकून प्रथम क्षेत्ररक्षणाचा निर्णय घेतला. बांगलादेशने प्रथम फलंदाजी करताना ३०६ धावा केल्या. ३०७ धावांच्‍या आव्‍हानाचा पाढलाग करताना तिसऱ्या षटकातच १२ धावांवर ऑस्ट्रेलियाला पहिला धक्का बसला. ट्रॅव्हिस हेड 10 धावा करून बाद झाला. त्याला तस्किन अहमदने त्रिफळाचीत (बोल्ड) केले. यानंतर मिचेल मार्श आणि डेव्हिड वॉर्नर यांनी ऑस्ट्रेलियाचा डाव सावरला. दोघांमधील शतकी भागीदारी झाली. दोघांनीही आपापली अर्धशतकी खेळी केली. यानंतर २३ व्या षटकामध्‍ये मुस्‍तफिझूरने वॉर्नरला शांतोकरवी झेलबाद केले. वॉर्नरने ६१ चेंडूत ६ चौकार आणि एक षटकार फटकावत ५३ धावांची खेळी केली.
307 धावांच्‍या आव्‍हानाचा पाढलाग करताना मिचेल मार्शने ८७ चेंडूत शतक झळकावले. यानंतर मार्शने फलंदाजी आणखी बहरली. त्याने १३२चेडूत १७७ धावा केल्या. आपल्‍या खेळीत त्याने १७ चाैकार आणि ९ षटकारांची आतषबाजी केली. मार्शला स्‍टीव्‍हन स्‍मिथ याची भक्‍कम साथ मिळाली. त्याने ५५ चेंडूत तीन चाैकार आणि एक षटकार फटकावतअर्धशतक ठाेकले. या दाेघांची १७५ धावांची भागीदारी निर्णायक ठरली. ऑस्‍ट्रेलियाने बांगलादेशवर ८ गडी राखून दणदणीत विजय मिळवला.
तत्‍पूर्वी फलंदाजीसाठी मैदानात उतरलेल्या बांगला देशच्या लिटन दास आणि तनजीद हसन यांनी सावध सुरूवात केली. १२ व्या षटकापर्यंत त्यांनी ७६ धावांची भागीदारी केली होती. बांगला देशला १२ व्या षटकात पहिला धक्का बसला. शॉन ॲबॉटने त्याच्याच चेंडूवर तनजीद हसनचा झेल घेतला. त्याला ३४ चेंडूत ३६ धावा करता आल्या. कर्णधार नझमुल हुसेन शांतो आणि लिटन दास यांनी शतकी खेळी केली. १०६ धावांवर मात्र बांगलादेशला दुसरा धक्का बसला. ॲडम झाम्पा याने लिटन दासला बाद केले. त्याने ४५ चेंडूत ३६ धावा केल्या.
कर्णधार नजमुल हुसेन शांतो ५७ चेंडूत ४५ धावा करून धावचीत झाला. ३६ व्या षटकाच्या महमुदुल्ला धावचीत झाला. त्याने २८ चेंडूत ३२ धावा केल्या. बांगला देशने ४२ व्या षटकामध्‍ये चार गडी गमावत २५० धावांचा टप्‍पा पूर्ण केला होता. ४३ व्या षटकांमध्‍ये झाम्‍पाने बांगला देशला पाचवा झटका दिला. झाम्‍पाने मुशफिकरला कमिन्सकरवी झेलबाद केले. त्याने २१ चेंडूत एका षटकाराच्‍या मदतीने २४ धावांची खेळी केली. मुशफिकुर रहीम याला झाम्पा याने पॅट कमिन्सकरवी झेलबाद केले. याशिवाय मेहदी हसन मिराजने २९ धावा आणि नसुम अहमदने ७ धावा केल्या. महेदी हसन दोन धावांवर तर तस्किन अहमद शून्यावर नाबाद राहिला.