सातारा : पुढारी वृत्तसेवा लंपी त्वचा रोगामुळे जिल्ह्यातील पशुपालक धास्तावला आहे. जिल्ह्यातील 11 गावात लंपी रोगाचा प्रादुर्भाव जनावरांना झाला आहे. या आजाराबाबत बळीराजा अनभिज्ञ असून तो भयभीत झाला आहे. सर्वत्र या आजाराचा गोंगाट सुरू असल्याने लंपी स्किन म्हणजे काय रं भाऊ असा बळीराजा विचारू लागला आहे. या आजाराबाबत पशुसंवर्धन विभागाने जनजागृती सुरू केली असून धास्तावून न जाता जनावरांची काळजी घेण्याचे बळीराजाला आवाहन केले आहे.
लंपी त्वचा रोग हा केवळ गोवंश व म्हैस वर्गातील जनावरांना होणारा विषाणूजन्य त्वचारोग आहे. हा रोग किटकांपासून पसरतो. हा आजार जनावरांपासून मानवास संक्रमित होत नाही. लंपी त्वचा रोग हा पशुधनातील वेगाने पसरणारा संसर्गजन्य आजार असला तरी पशुधन दगावण्याचे प्रमाण अत्यल्प आहे. पशुवैद्यकाच्या मार्गदर्शनानुसार लसीकरण करून घ्यावे. तत्काळ नजीकच्या पशुवैद्यकीय दवाखान्याशी संपर्क साधून उपचार करून घ्यावेत. त्वचेवरील गाठीचे जखमेत रूपांतर झाल्यास जखमेत जंतू पडू नये, यासाठी जखमेवर औषध मलम लावावे.
जनावरांच्या अंगावर 10 ते 20 मि.मी. व्यासाच्या गाठी येतात. सुरुवातीस भरपूर ताप, डोळ्यातून नाकातून चिकट स्राव, चारा पाणी खाणे कमी अथवा बंद, दूध उत्पादन कमी, काही जनावरात पायावर सूज येणे व लंगडणे आदी लक्षणे दिसून येतात.
बाधित जनावरे निरोगी जनावरांपासून वेगळी ठेवणे, कोणत्याही संभाव्य रोगी जनावरास निरोगी जनावरांच्या कळपात प्रवेशास बंदी करणे, रोग प्रादुर्भाव झालेल्या गावातील बाधित व निरोगी जनावरांना चराऊ कुरणांमध्ये एकत्रित सोडण्यास मनाई करणे, डास, गोचिड, तत्सम किड्यांचा बंदोबस्त करणे, तसेच निरोगी जनावरांच्या अंगावर किडे न चावण्यासाठी औषध लावणे व गोठ्यामध्ये यासाठीच्या औषधांची फवारणी करणे, रोग प्रादुर्भाव क्षेत्रातील जनावरांना रोग प्रादुर्भाव नसलेल्या ठिकाणी तसेच स्थानिक बाजारामध्ये नेण्यास प्रतिबंध करणे.
लंपी या रोगाचा संसर्ग कॅप्रीपॉक्स विषाणूमुळे होतो. हा विषाणू शेळ्या व मेढ्यांमधील देवी रोगाच्या विषाणूशी संबंधित आहे.
असा होतोय प्रसार डास, चावणार्या माशा, गोचिड, चिलटे, बाधित जनावरांचा स्पर्श, दूषित चारा-पाणी.