Nashik Kumbh Mela Live Updates
नाशिक : नाशिक-त्र्यंबकेश्वर सिंहस्थ कुंभमेळ्याच्या महापर्वाचा औपचारिक प्रारंभ आज (दि. ३१) रामकुंडावर राष्ट्रपती द्रौपदी मुर्मू यांच्या हस्ते धर्मध्वजारोहणाने होणार आहे, तर त्र्यंबकेश्वर येथे मुख्यमंत्री देवेंद्र फडणवीस यांच्या हस्ते ध्वजारोहण होणार आहे. सिंहस्थ ध्वजारोहण सोहळा दुपारी १२ वाजून २ मिनिटांनी अभिजित मुहूर्तावर धर्मध्वजाची स्थापना केली जाणार असून, यावेळी गोदावरी पूजन आणि यज्ञविधीही पार पडतील.
नाशिक : पुढारी वृत्तसेवा
गोदावरीचा पावन तीर... वैदिक मंत्रांचा मंगलघोष... शंखनादाने दुमदुमलेला आसमंत... भगव्या धर्मध्वजेच्या स्वागतासाठी एकवटलेला संतसमुदाय अन् श्रद्धेने भारावलेले हजारो भाविक ! अशा भक्तिमय वातावरणात राष्ट्रपती द्रौपदी मुर्मू यांच्या हस्ते शनिवारी (दि. ३१) दुपारी १२ वाजून २ मिनिटांनी रामकुंडावर अभिजित मुहूर्तावर धर्मध्वजारोहण करण्यात आले. या ऐतिहासिक क्षणाने नाशिक-त्र्यंबकेश्वर सिंहस्थ महाकुंभ पर्वाचा औपचारिक मंगलारंभ झाला.
बारा वर्षाच्या प्रतीक्षेनंतर येणाऱ्या श्रद्धेच्या महापर्वाची नांदी गोदामाईच्या साक्षीने झाली आणि अवघे नाशिक शहर भक्तिरसात न्हाऊन निघाले. धर्मध्वजारोहणापूर्वी राष्ट्रपतींनी यज्ञकुंडात समिथा अर्पण करून विश्वकल्याण, सुख-समृद्धी आणि सुयोग्य पर्जन्यवृष्टीसाठी प्रार्थना केली. त्यानंतर जीवनदायिनी गोदावरीचे विधिवत पूजन करून ध्वजाला वंदन केले. पुरोहितांच्या वेदमंत्रांच्या घोषात भगवी धर्मध्वजा आकाशात डौलाने फडकताच शंखनाद आणि जयघोषाने रामतीर्थाचा परिसर दुमदुमला. मंगलवाद्यांच्या निनादात मंत्रपुष्पांजली अर्पण करण्यात आली. श्री गंगा गोदावरी पंचकोठी पुरोहित संघाच्या वतीने राष्ट्रपतींचा विशेष ताम्रपत्र देऊन सन्मान करण्यात आला. या सोहळ्याला राज्यपाल जिष्णु देव वर्मा, उपमुख्यमंत्री एकनाथ शिंदे, उपमुख्यमंत्री सुनेत्रा पवार, केंद्रीय राज्यमंत्री प्रतापराव जाधव, पालकमंत्री गिरीश महाजन, मंत्री छगन भुजबळ यांच्यासह राज्य
मंत्रिमंडळातील सदस्य, खासदार, आमदार आणि प्रशासकीय अधिकारी उपस्थित होते. विविध आखाड्यांचे महंत, जगद्गुरू, धर्माचार्य आणि संत-महंतांच्या उपस्थितीने सोहळ्याला आध्यात्मिक उंची प्राप्त झाली. अखिल भारतीय आखाडा परिषदेचे अध्यक्ष श्रीमहंत रवींद्रपुरी महाराज यांच्यासह विविध आखाड्यांचे प्रतिनिधी वा ऐतिहासिक क्षणाचे साक्षीदार ठरले. धार्मिक विधींचे पौरोहित्य सतीश शुक्न आणि पुरोहित संघाचे अध्यक्ष चंद्रशेखर पंचाक्षरी यांनी केले. धर्मध्वजावरील अमृतकुंभ, ओंकार, 'श्रीं' अक्षर, बारा रेशमी गोंडे, घंटा आणि घुंगरू ही शुभचिन्हे भारतीय आध्यात्मिक परंपरा, मांगल्य, सामाजिक एकता आणि ब्रह्मनादाचे प्रतीक आहेत. ध्वजाच्या दुसऱ्या बाजूस गोदावरीचे वाहन असलेली मगर तसेच सूर्य-चंद्र अंकित आहेत. त्यामुळे हा ध्वज केवळ धार्मिक प्रतीक न राहता गोदावरीच्या माहात्त्याचा आणि संतपरंपरेच्या चिरंतन वारशाचा संदेश देणारा ठरला,
नाशिक, (त्र्यंबकेश्वर) : राष्ट्रपती द्रौपदी मुर्मू यांच्या हस्ते शनिवारी (दि.३१) त्र्यंबकेश्वर येथील पवित्र कुशावर्त तीर्थावर सिंहस्थ कुंभमेळ्यानिमित्त ध्वजपूजन सोहळा धार्मिक व मंगलमय वातावरणात संपन्न झाला. यावेळी राष्ट्रपतींच्या हस्ते गौतमी गंगा गोदावरी पूजन, सिंहस्थ ध्वजपूजन, विशेष अर्घ्य अर्पण तसेच गोदावरी आरती करण्यात आली.
मुख्यमंत्री देवेंद्र फडणवीस आणि दोन्ही उपमुख्यमंत्री त्र्यंबकेश्वर येथील तीर्थक्षेत्र कुशावर्त येथे पोहोचले आहेत. थोड्याच वेळात राष्ट्रपती द्रोपदी मुर्मू देखील पोहोचणार आहेत.
सिंहस्थ कुंभमेळा साठी नवीन घाटांची निर्मिती या ठिकाणी श्रीचंद्र घाटाची नव्याने निर्मिती
चंद्र घाटाच्या ठिकाणी लावण्यात आला आहे सिंहस्थ कुंभाचा ध्वज
या सिंहस्थ कुंभाच्या ध्वजावर समुद्रमंथनावेळी निघालेल्या 14 रत्नांचे दाखवण्यात आले आहे प्रतिबिंब
प्रति कुशावर्त म्हणून श्रीचंद्र घाटाची ओळख
राष्ट्रपती द्रौपदी मुर्मू ओझर विमानतळावर पोहोचल्या आहेत. यानंतर रामतीर्थ परिसरात सिंहस्थ धर्मध्वजारोहण सोहळ्यास उपस्थिती आणि दुपारी १२.०२ वाजता मुख्य ध्वजस्थापना होईल. दुपारी १२.३० वाजता त्या पुन्हा एमपीए अतिथिगृहात येतील. दुपारी २ वाजता त्र्यंबकेश्वर येथील कुशावर्त तीर्थावर गोदापूजन, तर २.३० वाजता त्र्यंबकेश्वर ज्योतिर्लिंग मंदिरात दर्शन व धार्मिक विधी होतील. त्यानंतर सायंकाळी ४ वाजता एमपीए अतिथिगृहात परतल्यानंतर पुढील कार्यक्रमांसाठी हालचाली सुरू होतील. सायंकाळी ५.३० वाजता सार्वजनिक कार्यक्रम आणि गोदावरी महाआरतीच्या सोहळ्यात राष्ट्रपती सहभागी होणार आहेत.
वेळ आणि नियोजित कार्यक्रम
सकाळी ९.०० - नाशिक विमानतळावर आगमन
सकाळी १०.०० - महाराष्ट्र पोलीस अकॅडमी (एमपीए) अतिथिगृह येथे आगमन
सकाळी ११.०० - रामतीर्थ, नाशिक येथे धर्मध्वजारोहण सोहळ्यास उपस्थिती
दुपारी १२.०२ - अभिजित मुहूर्तावर रामकुंड येथे धर्मध्वजारोहण
दुपारी १२.३० - एमपीए अतिथिगृह येथे आगमन
दुपारी २.०० - कुशावर्त तीर्थ, त्र्यंबकेश्वर येथे गोदापूजन
दुपारी २.३० - त्र्यंबकेश्वर ज्योतिर्लिंग मंदिरात दर्शन व पूजाविधी
दुपारी ४.०० - एमपीए अतिथिगृह येथे आगमन
सायंकाळी ५.३० - सार्वजनिक कार्यक्रम, शंखनाद, सांस्कृतिक कार्यक्रम व गोदावरी
गंगापूजनानंतर राष्ट्रपती मुर्मू यांच्या हस्ते सिंहस्थ ध्वजारोहण केले जाणार आहे. हा सोहळा सुमारे पाच मिनिटांचा असणार आहे. ध्वजारोहण सोहळ्यानंतर औपचारिकरित्या कुंभपर्वास प्रारंभ होणार असून हे कुंभपर्व पुढील वर्षभर सुरू राहणार आहे. दरम्यान, ध्वजारोहण सोहळ्यानंतर राष्ट्रपतींच्या हस्ते गोदावरीची महाआरती केली जाणार आहे.
राष्ट्रपती मुर्मू यांचे रामकुंडावर आगमन होणार आहे. यावेळी त्या गौतमी गोदावरी मंदिर परिसरात होणाऱ्या यज्ञपूजा करणार असून यज्ञात राष्ट्रपतींच्या हस्ते समिधाही अर्पण केल्या जाणार आहे. सुमारे १० मिनिटांच्या या विधीसाठी पुरोहित संघाचे प्रतिनिधीही उपस्थित राहणार असून सुहास शुक्ल हे यजमान म्हणून उपस्थित राहणार आहेत.
सिंहस्थ कुंभमेळ्याच्या औपचारिक प्रारंभानिमित्त शनिवारी (दि.३१) सायंकाळी गोदावरीच्या तीरावर होणाऱ्या भव्य महाआरती सोहळ्यात देशातील प्रमुख धर्माचार्य, जगद्गुरू आणि तेरा आखाड्यांचे साधू-महंत एकाच व्यासपीठावर एकत्र येणार असून राष्ट्रपती द्रौपदी मुर्मू यांच्या प्रमुख उपस्थितीत होणाऱ्या या सोहळ्यासाठी शृंगेरी पीठाचे शंकराचार्य विदुशेखर भारती यांच्यासह चार जगद्गुरू आणि शैव-वैष्णव परंपरेतील सर्व तेरा आखाड्यांचे प्रतिनिधी नाशिकमध्ये दाखल झाले आहेत.
धर्मध्वज सोहळा आणि राष्ट्रपती द्रौपदी मुर्मू यांच्या नाशिक दौऱ्याच्या पार्श्वभूमीवर संपूर्ण शहरात अभूतपूर्व सुरक्षा व्यवस्था तैनात करण्यात आली आहे. सोहळ्यासाठी तब्बल पाच हजार पोलिसांचा फौजफाटा बंदोबस्तासाठी सज्ज झाला आहे. यामध्ये नाशिक शहर पोलिस दलातील तीन हजार, तर बाहेरच्या जिल्ह्यांतून आलेल्या दोन हजार पोलिसांचा समावेश आहे. राष्ट्रपतींचा ओझर विमानतळ ते नाशिक असा प्रवास मोटारीने होणार असल्याने वाहतूक व्यवस्था सुरळीत ठेवण्यासाठी स्वतंत्र ७०० पोलिसांचा ताफा तैनात करण्यात आला आहे.
नगरसेवकांना बसण्यासाठी नियोजन नसल्याने झाले आक्रमक
नगरसेवकांनी कुंभमेळा आयुक्त शेखर सिंह यांची भेट घेत व्यक्त केली नाराजी
ज्या ठिकाणी नगरसेवकांना बसण्याचे पास देण्यात आले होते त्या ठिकाणी प्रवेश नाकारल्याने नगरसेवक झाले नाराज
सिंहस्थ कुंभमेळा ध्वजारोहण कार्यक्रमात प्रशासनाकडून नियोजनाचा फज्जा
सायंकाळी ५.३० वाजता सार्वजनिक कार्यक्रमात राष्ट्रपती सहभागी होतील. यावेळी शृंगेरीपीठाचे शंकराचार्य विदुशेखर भारती यांच्यासह चार जगद्गुरू आणि तेरा आखाड्यांचे साधू-महंत एकाच व्यासपीठावर उपस्थित राहणार आहेत. सुमारे दोनशे वर्षांनंतर शैव-वैष्णव परंपरेतील संत-महंत एकत्र येत असल्याचा दावा करण्यात येत आहे
नाशिक-त्र्यंबकेश्वर सिंहस्थ कुंभमेळा सोहळ्याची सुरुवात ध्वजारोहणाने होणार असून या कार्यक्रमासाठी राष्ट्रपती द्रौपदी मुर्मू यांचे ओझर विमानतळ येथे आगमन झाले. यावेळी राज्यपाल डॉ. जिष्णु देव वर्मा यांनी त्यांचे स्वागत केले.
उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, पणन व राजशिष्टाचार मंत्री जयकुमार रावल, अन्न व औषध प्रशासन मंत्री नरहरी झिरवाळ, आदिवासी विकास मंत्री डॉ. अशोक ऊईके, शालेय शिक्षण मंत्री दादाजी भुसे, खासदार भास्कर भगरे,आमदार दिलीप बनकर, आमदार सुहास कांदे, उपमहापौर विलास शिंदे, जलसंपदा सचिव एकनाथ डवले, अतिरिक्त पोलिस महासंचालक रितेशकुमार, हिंदुस्थान एरोनॉटिकल लिमिटेडचे मुख्य कार्यकारी अधिकारी शिशिरकुमार पात्रा, स्कूल ऑफ आर्टिलरीचे कमांडंट लेफ्टनंट जनरल एन. एस. सराना, एअर कमाडोर विक्रम सिंग, जिल्हाधिकारी आयुष प्रसाद यावेळी उपस्थित होते.