पुढारी ऑनलाई: देशातील अनेक राज्यांमध्ये लम्पी विषाणूमुळे हजारो जनावरांचा मृत्यू झाला आहे. दरम्यान, हरियाणाच्या हिसार जिल्ह्यातून एक चांगली बातमी आली आहे. सूत्रांनी दिलेल्या माहितीनुसार, हिसार येथील कृषी मंत्रालयाच्या घोडा संशोधन केंद्राने लम्पी विषाणूवर लस तयार केली आहे. ज्याची चाचणीही सुरू झाली आहे. सध्या, त्याच्या व्यावसायिक उत्पादनाचा परवाना आरोग्य मंत्रालयाच्या अंतर्गत भारतातील औषध नियंत्रकाकडून मिळणे बाकी आहे. परवाना मिळताच लसीचे व्यावसायिक उत्पादन सुरू केले जाईल.
पशुसंवर्धन मंत्रालयातर्फे देशभरात मोठ्या प्रमाणावर मोहीम राबवून सर्व प्राण्यांना लसीकरण करण्यात येणार असल्याची माहितीही मिळाली आहे. आतापर्यंत मिळालेल्या माहितीनुसार, या लसीच्या चाचणीत यशस्वी परिणाम नोंदवले गेले आहेत. सूत्रांनी दिलेल्या माहितीनुसार, ही लस कधी आणि कशी दिली जाईल, यासाठीच्या मार्गदर्शक तत्त्वावर काम सुरू आहे.
विशेष म्हणजे लम्पी व्हायरसमुळे देशभरात आतापर्यंत ५७ हजारांहून अधिक जनावरांचा मृत्यू झाला आहे. त्यापैकी राजस्थानमध्ये जवळपास 37 हजार जनावरांचा मृत्यू झाला आहे. या आजाराचा सर्वाधिक प्रभाव राजस्थान आणि त्याच्या लगतच्या राज्यांमध्ये दिसून येत आहे. त्याच दिवशी केंद्र सरकारने बाधित राज्यांना या आजारावर नियंत्रण ठेवण्यासाठी लसीकरण प्रक्रिया जलद करण्यास सांगितले होते.
गुजरात, राजस्थान, पंजाब, हरियाणा आणि उत्तर प्रदेशसह 6-7 राज्यांमध्ये हा त्वचारोग पसरला असल्याचे केंद्रीय पशुसंवर्धन विभागाकडून सांगण्यात आले. आंध्र प्रदेशातही या आजाराची काही प्रकरणे आढळून आली आहेत. आतापर्यंत देशात 11 लाखांहून अधिक जनावरांना संसर्ग झाला आहे.
लम्पी त्वचा रोग (एलएसडी) हा एक संसर्गजन्य विषाणूजन्य रोग आहे, जो गुरांना प्रभावित करतो. यामध्ये तापासह त्वचेवर एक ढेकूळसारखी गाठ तयार होते आणि नंतर जनावराचा मृत्यू होऊ शकतो. हा रोग डास, माश्या, गुरांच्या थेट संपर्कातून किंवा षित अन्न आणि पाण्याद्वारे पसरतो.