पुणे; पुढारी वृत्तसेवा : कारागृहातील बंदीवानांमध्ये अनेक सुप्त कलागुण असतात, बंद्यांना त्यांचे कलागुण, छंद कारागृहात असताना जोपासण्यासाठी पोषक वातावरण उपलब्ध करून दिल्यास त्यांच्याकडून विविध कल्पक गोष्टींची निर्मिती होते. अशा कारागृहात उत्पादित झालेल्या वस्तू लवकरच ई-मार्केटप्लसवर नागरिकांना खरेदी करण्यासाठी उपलब्ध करुन देण्यात येतील, असे अपर पोलीस महासंचालक व कारागृह व सुधारसेवाचे महानिरीक्षक अमिताभ गुप्ता यांनी सांगितले. तसेच बंदीजनातील कलागुणांना वाव देण्यासाठी आगामी कालावधीत विविध प्रयत्न केले जातील, असे त्यांनी सांगितले.
मकर संक्रांतीनिमित्त कारागृहातील बंदीजनांनी तयार केलेल्या वस्तूंचे प्रदर्शन व विक्रीच्या स्टॉलचे गुप्ता यांच्या हस्ते बुधवारी उद्घाटन करण्यात आले. त्यावेळी ते बोलत होते. या वेळी कारागृह उपमहानिरीक्षक स्वाती साठे, उपमहानिरीक्षक सुनील ढमाळ, येरवडा कारागृह अधीक्षक शिवशंकर पाटील, जिल्हा विधी सेवा प्राधिकरणाच्या सचिव एम डी कश्यप उपस्थित होते.
देवघर, चौरंग, पाट, विविध लाकडी टेबल,खूर्ची ,कपाटे,गणवेश,सतरंजी, साड्या, फाईल्स तसेच शोभेच्या वस्तू अशा विविध वस्तू या प्रदर्शनात विक्रीसाठी ठेवल्या आहेत. हे प्रदर्शन येरवडा येथील कारागृहाच्या उद्योग विक्री केंद्रात 26 जानेवारीपर्यंत सुरु राहणार आहे. बंदीजनांनी तयार केलेल्या नवनवीन कल्पक व दर्जेदार वस्तू नागरिकांना खरेदी करता यावेत, यासाठी या प्रदर्शनाचे असे अमिताभ गुप्ता यांनी सांगितले.