पुढारी ऑनलाईन डेस्क : अमेरिकन अवकाश संशोधन संस्था 'नासा'च्या भारतीय वंशाच्या अंतराळवीर सुनीता विल्यम्स ( Sunita Williams )आणि त्यांचे साथीदार विल्मोर बुच हे अनेक महिन्यांपासून अंतराळात 'अडकले' आहेत. नुकतेच सुनीता विल्यम्स यांचा एका फोटो समोर आला होता. या फोटोत त्यांच्या वजनात कमालीची घट झाल्याचे दिसत होते. हा सर्वांसाठीच मोठा धक्का होता. मात्र आता अंतराळातून गूड न्यूज समोर आली आहे. सुनीता विल्यम्स यांचा नवा फोटो 'नासा'ने आपल्या इंस्टाग्राम अकाऊंटवर पोस्ट केला आहे. यामध्ये त्यांची प्रकृती पूर्वीपेक्षा निरोगी दिसत आहे.
नासाचा नवीन फोटो त्याच्या इंस्टाग्राम अकाऊंटवर पोस्ट केला आहे. या फोटोमध्ये सुनीता विल्यम्स या SpaceX ड्रॅगन क्रू स्पेसक्राफ्टच्या खिडकीतून बाहेर पाहताना दिसत आहेत. "NASA अंतराळवीर सनी विल्यम्स तिच्या Expedition 72 स्वेटरमध्ये SpaceX ड्रॅगन क्रू स्पेसक्राफ्टच्या गोल खिडकीतून बाहेर पाहात आहेत. जेव्हा ती पृथ्वीकडे पाहते तेव्हा तिचा चेहरा पृथ्वीवरून येणाऱ्या प्रकाशाने चमकतो." असे कॅप्शनj[ या फोटोला देण्यात आले आहे.
नासाने शेअर केलेल्या नवीन फोटोमध्ये फोटोमध्ये सुनीता विल्यम्स यांचा चेहरा एकाबाजूला दिसत आहे. यामध्ये त्या पूर्णपणे निरोगी दिसत आहेत. या फोटोला उत्स्फूर्त प्रतिसाद मिळत आहे. अल्पावधीतच 21 हजारांहून अधिक लोकांनी फोटोला लाईक केले आहे. याशिवाय अनेक लोक कमेंट करून प्रतिक्रिया देत आहेत. एका वापरकर्त्याने विचारले आहे की, त्या केव्हा परत येणार आहेत. यासाठी कोणतेही मिशन आयोजित केले आहे का? तर एकाने म्हटलं आहे की, सुनीता विल्यम्स या पृथ्वीवर सुरक्षित परतावे अशी माझी इच्छा आहे.
काही दिवसांपूर्वी सुनीता विल्यम्स याचा एक फोटो सोशल मीडियावर शेअर करण्यात आला होता. यामध्ये त्यांचे वजन कमालीचे घटलेले दिसले. त्यावर सर्वांनीच चिंता व्यक्त केली होती. नासाच्या सूत्रांनी न्यूयॉर्क पोस्टला सांगितले होते की,"सुनीता विल्यम्स यांचे सध्याचे छायाचित्र पाहून त्यांच्या प्रकृतीबद्दल चिंतेचे वातावण निर्माण झाले आहे. त्यांचे वजन कमालीचे घटले आहे. वजन पूर्वपदावर आणणे हे नासाचे प्राधान्य आहे". यानंतर सुनीता विल्यम्स यांनी आपली प्रकृती उत्तम असून, दैनंदिनीचे तपशीलवार वर्णन केले होते.
सुनीता विल्यम्स हे सहकारी अंतराळवीर बुच विल्मोर यांच्यासह जूनच्या पहिल्या आठवड्यात आठ दिवसांसाठी आंतरराष्ट्रीय अंतराळ स्थानकावर गेल्या होत्या; परंतु बोईंग स्टारलाइन्समध्ये तांत्रिक बिघाड झाल्यामुळे विल्यम्स आणि बुचर यांना १५० दिवसांपेक्षा जास्त काळ तेथे राहावे लागले आहे. दरम्यान, 'नासा'ने दोन्ही अंतराळवीर पुढील वर्षी फेब्रुवारीमध्ये पृथ्वीवर परत येऊ शकतील, अशी शक्यता वर्तवली आहे.
बोईंग स्टारलाइन्स प्रक्षेपणावेळी सुनीता विल्यम्स यांचे वजन सुमारे 140 पौंड होते. अंतराळ जीवनातील उच्च भौतिक गरजा संतुलित करण्यासाठी आवश्यक असलेल्या 3,500 ते 4,000 कॅलरीजचे दररोज सेवन पूर्ण करण्यासाठी अंतराळवीर प्रयत्न करत आहेत. वजनहीन वातावरणात स्नायू आणि हाडांचे वस्तुमान टिकवून ठेवण्यासाठी दररोज दोन तासांपेक्षा जास्त व्यायाम करावा लागतो. ज्यामुळे अतिरिक्त कॅलरी बर्न होतात, असेही नासाकडून स्पष्ट करण्यात आले आहे.