वॉशिंग्टन; वृत्तसंस्था : जागतिक ऊर्जा बाजारात वाढलेल्या किमतींच्या पार्श्वभूमीवर अमेरिकेने रशियन तेलाच्या विक्रीवरील काही निर्बंध तात्पुरते सैल करण्याचा निर्णय घेतला आहे. मात्र, या निर्णयावर जर्मनीचे चान्सलर फ्रेडरिक मर्झ यांनी तीव्र नाराजी व्यक्त केली आहे. त्यांनी स्पष्ट शब्दांत सांगितले की, रशियावरील दबाव कमी करणे चुकीचे ठरेल.
दरम्यान, अमेरिकेचे ट्रेझरी सचिव स्कॉट बेसेंट यांनी 30 दिवसांसाठी तात्पुरती परवानगी जाहीर केली आहे. समुद्रात अडकलेल्या रशियन तेलाची खरेदी या कालावधीत करता येणार आहे. हा निर्णय ऊर्जा दर नियंत्रणात ठेवण्यासाठी घेतल्याचे सांगण्यात आले. तथापि, मध्य पूर्वेतील संघर्ष आणि युक्रेन युद्धामुळे जागतिक तेल बाजारावर मोठा परिणाम होत आहे. आंतरराष्ट्रीय बाजारात ब्रेंट क्रूडची किंमत पुन्हा 100 डॉलर प्रतिबॅरलवर गेली आहे. मेर्झ यांनी सांगितले की, रशिया अजूनही युद्ध थांबवण्यासाठी कोणतीही चर्चा करण्यास तयार नाही. त्यामुळे मॉस्कोवरचा दबाव वाढवणे गरजेचे आहे. त्यांनी असेही स्पष्ट केले की, मध्य पूर्वेतील युद्धामुळे युक्रेनला दिले जाणारे समर्थन कमी होणार नाही.
युरोपातील इतर नेत्यांचीही चिंता
जर्मनीच्या अर्थमंत्री कॅथरिना रिच यांनीही चिंता व्यक्त केली. अमेरिकेच्या या निर्णयामुळे रशियाला पुन्हा आर्थिक फायदा मिळू शकतो आणि त्यामुळे पुतीन यांच्या युद्धखर्चासाठी निधी उपलब्ध होईल, असे त्यांनी म्हटले. यापूर्वी फ्रान्सचे राष्ट्राध्यक्ष इमॅन्युएल मॅक्रॉन यांनीही जी-7 नेत्यांशी चर्चेनंतर असेच मत व्यक्त केले होते. मध्य पूर्वेत येथे निर्माण झालेल्या संकटाचा बहाणा करून रशियावरील निर्बंध हटवणे योग्य नसल्याचे त्यांनी सांगितले.
ऊर्जा बाजारात हालचाल
रशियाचे राष्ट्राध्यक्ष व्लादिमीर पुतीन यांचे विशेष दूत किरिल दिमित्रीयेव्ह यांनी अमेरिकेसोबत झालेल्या चर्चेनंतर महत्त्वाचा दावा केला आहे. अमेरिकेला आता रशियन तेलाचे जागतिक बाजारातील महत्त्व अधिक चांगले समजू लागले आहे, असे त्यांनी म्हटले. फ्लोरिडामध्ये अमेरिकन प्रतिनिधींशी झालेली बैठक उत्पादक ठरल्याचेही त्यांनी सांगितले. दिमित्रीयेव्ह यांनी टेलिग्रामवरील पोस्टमध्ये सांगितले की, रशिया-अमेरिका संबंध सुधारण्यासाठी आणि जागतिक ऊर्जा संकट कमी करण्यासाठी काही आशादायी प्रकल्पांवर चर्चा झाली.