मुंबई : पंतप्रधान नरेंद्र मोदी यांनी इटलीच्या पंतप्रधान जॉर्जिया मेलॉनी यांना ‘मेलॉडी’ (Melody) टॉफी भेट म्हणून दिल्यानंतर शेअर बाजारात एका वेगळ्याच आणि रंजक घडामोडीची नोंद झाली. वास्तविक पाहता, ‘मेलॉडी’ ही टॉफी 'पार्ले प्रॉडक्ट्स' (Parle Products) या नामांकित कंपनीद्वारे तयार केली जाते. ही मूळ कंपनी भारतीय शेअर बाजारात सूचिबद्ध (Listed) नाही. मात्र, केवळ नावातील साधर्म्यामुळे गुंतवणूकदारांचा गैरसमज झाला आणि त्यांनी 'पार्ले इंडस्ट्रिज' (Parle Industries) या भलत्याच कंपनीचे शेअर्स खरेदी करण्यासाठी एकच गर्दी केली. परिणामी, या कंपनीच्या शेअर्सना अचानक अप्पर सर्किट लागले.
इटलीच्या पंतप्रधान जॉर्जिया मेलॉनी यांनी बुधवारी (दि. २०) सकाळी त्यांच्या अधिकृत 'X' अकाऊंटवरून पंतप्रधान नरेंद्र मोदी यांच्यासोबतचा एक हलका-फुलका व्हिडिओ शेअर केला. या व्हिडिओला त्यांनी "भेटवस्तूसाठी धन्यवाद" असे कॅप्शन दिले होते. हा व्हिडिओ सोशल मीडियावर वेगाने व्हायरल झाला आणि त्यानंतर ‘मेलॉडी’ टॉफीची सर्वत्र जोरदार चर्चा सुरू झाली. इंटरनेटवर ही चर्चा रंगत असतानाच, शेअर बाजारातील गुंतवणूकदारांनी घाईघाईत या नावाशी मिळतीजुळती कंपनी शोधण्यास सुरुवात केली.
या वाढत्या चर्चेचा थेट फायदा 'पार्ले इंडस्ट्रिज' या पेनी स्टॉक असलेल्या कंपनीला झाला. अवघ्या ५ रुपये किमतीचा हा शेअर २० मे रोजी 'मेलॉडी'च्या बातमीनंतर ५ टक्क्यांच्या अप्पर सर्किटसह ५.२५ रुपयांवर पोहोचला. उपलब्ध आकडेवारीनुसार, या कंपनीच्या शेअरची ५२ आठवड्यांची सर्वोच्च पातळी १७.४४ रुपये, तर नीचांकी पातळी ४.११ रुपये आहे. सध्या या कंपनीचे एकूण बाजार भांडवल (Market Cap) सुमारे २५.६४ कोटी रुपये आहे.
गुंतवणुकीचा आलेख पाहिल्यास, या कंपनीच्या शेअरने गेल्या एका आठवड्यात गुंतवणूकदारांना ५.६३ टक्के परतावा दिला आहे, तर गेल्या एका महिन्यात त्यात ३.९६ टक्क्यांची वाढ नोंदवली गेली आहे. मात्र, गेल्या तीन महिन्यांचा विचार केला तर या शेअरमध्ये सुमारे ३५.०२ टक्क्यांची घसरण झाली होती.
या संपूर्ण प्रकरणातील सर्वात महत्त्वाची आणि तांत्रिक बाब म्हणजे, ज्या 'मेलॉडी' टॉफीमुळे ही तेजी आली, तिचा पार्ले इंडस्ट्रिजशी दूरवरचाही संबंध नाही. 'मेलॉडी' आणि 'पार्ले-जी' (Parle-G) सारखे सुप्रसिद्ध ब्रँड हे 'पार्ले प्रॉडक्ट्स' या खासगी कंपनीच्या मालकीचे आहेत. याउलट, शेअर बाजारात सूचिबद्ध असलेल्या 'पार्ले इंडस्ट्रिज' या कंपनीचा मुख्य व्यवसाय पायाभूत सुविधा (Infrastructure), रिअल इस्टेट आणि कागदी कचरा पुनर्चक्रण (Paper Waste Recycling) या क्षेत्रांशी संबंधित आहे. केवळ 'पार्ले' या नावातील साधर्म्यामुळे गुंतवणूकदारांनी या कंपनीत मोठ्या प्रमाणावर खरेदी केल्याचे स्पष्ट झाले आहे.
(Disclaimer : शेअर बाजार, म्युच्युअल फंड किंवा क्रिप्टोकरन्सीमधील गुंतवणूक ही बाजारपेठेतील जोखमींच्या अधीन असते. वरील वृत्तांतात दिलेली माहिती केवळ माहितीच्या उद्देशाने असून, याला कोणत्याही प्रकारचा वित्तीय किंवा गुंतवणुकीचा सल्ला मानू नये. गुंतवणूक करण्यापूर्वी आपल्या प्रमाणित वित्तीय सल्लागाराचा (Financial Advisor) सल्ला घेणे आवश्यक आहे. गुंतवणुकीतून होणाऱ्या कोणत्याही नफा किंवा नुकसानीस वृत्तसंस्था जबाबदार राहणार नाही.)