Miracle amidst Nepal floods! 64-year-old woman pulled out alive after 10 days under the debris
पुढारी ऑनलाईन : बचाव पथकाच्या म्हणण्यानुसार, पुराच्या वेगवान प्रवाहामुळे संपूर्ण घर सुमारे १०० मीटर वरच्या दिशेने वाहून गेले होते. घराचे साडेतीन मजले पूर्णपणे चिखल आणि ढिगाऱ्याखाली गाडले गेले होते. केवळ वरच्या मजल्याचा काही भागच बाहेरून दिसत होता.
नेपाळमध्ये आलेल्या भीषण पुरामुळे एका बाजूला हजारो लोकांचे जीवन उद्ध्वस्त झाले, तर दुसरीकडे काही अशा घटना समोर येत आहेत, ज्या लोकांसाठी आशेच्या किरणापेक्षा कमी नाहीत. नेपाळमध्ये आलेल्या या विनाशकारी पुरात १२०० हून अधिक लोकांचा मृत्यू झाला असून, ३ हजारांहून अधिक लोक बेपत्ता असल्याचे सांगितले जात आहे.
मात्र, या भीषण आपत्तीच्या काळात नुवाकोटमधून शनिवारी एक अशी बातमी समोर आली, ज्याने सर्वांनाच आश्चर्याचा धक्का दिला. नुवाकोटमधील बिदूर परिसरात तब्बल १० दिवस मलब्याखाली दबलेल्या ६० वर्षीय चंडिका श्रेष्ठा यांना जिवंत बाहेर काढण्यात आले. महिलेच्या बचावकार्याचा व्हिडिओ सोशल मीडियावर काही वेळातच मोठ्या प्रमाणात व्हायरल झाला.
चंडिका श्रेष्ठा यांच्या कुटुंबीयांनी काही दिवसांपूर्वीच त्यांना मृत समजून त्यांच्या मृत्यूनंतरच्या विधींनाही सुरुवात केली होती. मात्र, ही घटना समोर आल्यानंतर आता अनेकांच्या मनात प्रश्न निर्माण झाला आहे की, मलब्याच्या ढिगाऱ्याखाली महिला जिवंत असल्याचे कसे समजले आणि तब्बल १० दिवसांनंतर त्यांची सुटका कशी करण्यात आली? चला जाणून घेऊया संपूर्ण घटना.
कुटुंबीयांनी केले होते अंत्यविधी
‘काठमांडू पोस्ट’च्या वृत्तानुसार, नेपाळमधील बिदूर परिसरात आलेल्या भीषण पुरामुळे चार मजली घर उद्ध्वस्त झाले होते. याच घराच्या सर्वात वरच्या मजल्यावरून ६० वर्षीय चंडिका श्रेष्ठा यांना जिवंत बाहेर काढण्यात आले.
चंडिका सुमारे १० दिवस या मलब्याखाली अडकून पडल्या होत्या. पूर आल्यानंतर तब्बल १० दिवस त्यांचा काहीही ठावठिकाणा लागला नव्हता. त्यांच्या नातेवाईकांनीही त्या जिवंत परत येतील, ही आशा जवळपास सोडून दिली होती.
इतकेच नव्हे, तर आठव्या दिवशी कुटुंबीयांनी त्यांच्या मृत्यूनंतर केले जाणारे धार्मिक विधी सुरू केले होते. त्यांच्या शरीराचे प्रतीक म्हणून कुशाच्या गवतापासून एक प्रतिकात्मक पुतळा तयार करण्यात आला आणि त्यानंतर धार्मिक विधी करण्यात आले.
११व्या दिवशी समोर आली धक्कादायक बातमी
मात्र, या भीषण आपत्तीनंतर ११व्या दिवशी शनिवारी एक धक्कादायक बातमी समोर आली. सोशल मीडियावर काही व्हिडिओ समोर आले, ज्यामध्ये नेपाळमधील नुवाकोट जिल्ह्यातील ऐतिहासिक बाजारपेठ असलेल्या बेत्रावती परिसरात पुरामुळे उद्ध्वस्त झालेल्या एका घराच्या मलब्यातून एका अशक्त महिलेला जिवंत बाहेर काढताना दिसत होते. नंतर ही महिला ६४ वर्षीय चंडिका श्रेष्ठा असल्याचे समोर आले. त्या बिदूर नगरपालिका-१० मधील बेत्रावती परिसरातील रहिवासी आहेत.
चंडिका २६ ऑगस्ट रोजी त्यांच्या कुटुंबातील इतर चार सदस्यांसह बेपत्ता झाल्या होत्या. त्या दिवशी अचानक आलेल्या पुरामुळे भोटेकोशी नदीच्या परिसरात मोठ्या प्रमाणात हाहाकार माजला होता आणि अनेक वस्त्या पूर्णपणे उद्ध्वस्त झाल्या होत्या.
चंडिका श्रेष्ठा यांचा जीव कसा वाचला?
पुराच्या ११व्या दिवशी चंडिका श्रेष्ठा जिवंत असल्याचा व्हिडिओ समोर आला. या व्हिडिओमध्ये त्यांना बेत्रावती येथे चिखल आणि मलब्याच्या ढिगाऱ्यातून बाहेर काढताना दिसत आहेत. मिळालेल्या माहितीनुसार, नेपाळ पोलिसांचे एक पथक त्या परिसरात रस्ते बांधणीच्या कामासाठी पोहोचले होते. याचदरम्यान जवानांना मलब्याखाली दबलेल्या एका घराजवळून हलका रडण्याचा आवाज ऐकू आला.
पोलिसांनी वेळ न दवडता हाताने चिखल आणि मलबा हटवण्यास सुरुवात केली. त्यानंतर खिडकी तोडून जवान घराच्या आत पोहोचले आणि अखेर चंडिका यांच्यापर्यंत पोहोचण्यात त्यांना यश आले.
बचाव पथकाच्या म्हणण्यानुसार, पुराच्या वेगवान प्रवाहामुळे संपूर्ण घर सुमारे १०० मीटर वरच्या दिशेने वाहून गेले होते. घराचे साडेतीन मजले पूर्णपणे चिखल आणि मलब्याखाली गाडले गेले होते. केवळ वरच्या मजल्याचा काही भागच बाहेर दिसत होता. बचाव केल्यानंतर चंडिका यांना उपचारासाठी काठमांडू येथील बीरेंद्र रुग्णालयात दाखल करण्यात आले. तेथे त्यांच्यावर उपचार सुरू करण्यात आले.
चंडिका यांच्या कुटुंबातील इतर सदस्यांचे काय झाले?
चंडिका यांचे मेहुणे ईश्वरी लाल श्रेष्ठा देखील पुराच्या वेळी त्याच घरात होते. मात्र, ते कसाबसा सुरक्षित बाहेर पडण्यात यशस्वी झाले. दरम्यान, त्यांची पत्नी सुषमा, चंडिका यांची बहीण आणि त्यांची काकू यांचा अद्याप कोणताही ठावठिकाणा लागलेला नाही. तिघीही अजून बेपत्ता असून, कुटुंबीय त्यांचा शोध लागेल, या आशेवर आहेत.
ईश्वरी लाल यांनी वृत्तपत्राला सांगितले की, पुराचा इशारा मिळाल्यानंतर त्यांनी आपल्या पत्नीला झोपेतून उठवले होते. मात्र, त्यांच्या पत्नीने सकाळची प्रार्थना पूर्ण करण्यासाठी काही वेळ थांबण्याचा निर्णय घेतला. याचदरम्यान ईश्वरी लाल आपल्या दुकानात ग्राहकांच्या कामात व्यस्त झाले. त्यांनी सांगितले की, काही वेळातच त्यांनी आपल्या डोळ्यांसमोर पुराच्या वेगवान पाण्यात घर उद्ध्वस्त होताना पाहिले.
हे दृश्य पाहून ते काही काळ बेशुद्ध झाले. काही मिनिटांनी शुद्धीवर आल्यानंतर त्यांना त्या ठिकाणी घराचा जवळपास कोणताही भाग शिल्लक नसल्याचे दिसले.