israel usa iran war donlad trump threat tehran nuclear project destroy benjamin netanyahu
पुढारी ऑनलाईन :
Israel-Iran conflict इस्रायल आणि इराण यांच्यातील तणाव आणखी वाढला आहे. इस्रायलने इराणची राजधानी तेहरान येथे मोठा हवाई हल्ला केल्याचे अधिकृतरीत्या जाहीर करण्यात आले आहे. या हल्ल्यानंतर अमेरिकेचे राष्ट्राध्यक्ष डोनाल्ड ट्रम्प यांनी इराणविरोधात अत्यंत आक्रमक भूमिका घेतली आहे.
इस्रायल आणि इराण यांच्यात दीर्घकाळापासून सुरू असलेल्या तणावानंतर इस्रायली हवाई दलाने अमेरिकेच्या सहकार्याने इराणमधील ३० हून अधिक ठिकाणांवर हल्ले केले आहेत. या हल्ल्यांनंतर संपूर्ण इराणमध्ये हाय अलर्ट घोषित करण्यात आला आहे.
या कारवाईची पुष्टी झाल्यानंतर डोनाल्ड ट्रम्प यांनी स्पष्ट शब्दांत सांगितले की, अमेरिका कोणत्याही परिस्थितीत इराणला अणुबॉम्ब बनवू देणार नाही. ट्रम्प यांनी याआधीही इराणला इशारा दिला होता की, जर अणुकरार केला नाही तर त्याचे गंभीर परिणाम भोगावे लागतील. त्यांनी असेही म्हटले की, इराणवर अशा प्रकारचे हल्ले पुढेही सुरू राहू शकतात.
“शस्त्रे खाली ठेवा, नाहीतर मृत्यूला सामोरे जा”
माहितीनुसार, ट्रम्प यांनी इराणला आतापर्यंतची सर्वात कठोर चेतावणी दिली आहे. त्यांनी इराणला शस्त्रे टाकून शरण येण्यास सांगितले असून, तसे न केल्यास निश्चित मृत्यूला सामोरे जावे लागेल, असे म्हटले आहे. ही मोठी लष्करी कारवाई इराणला त्याचा अणुकार्यक्रम पुन्हा सुरू करण्यापासून आणि क्षेपणास्त्र विकास रोखण्यासाठी करण्यात आल्याचे त्यांनी स्पष्ट केले.
व्हिडिओ संदेशात ट्रम्प म्हणाले की, इराणच्या अणु महत्त्वाकांक्षा कोणत्याही परिस्थितीत पूर्ण होऊ दिल्या जाणार नाहीत. “इराण कधीही अण्वस्त्र मिळवू शकणार नाही. अमेरिका इराणची अणु केंद्रे पूर्णपणे नष्ट करेल,” असे त्यांनी ठामपणे सांगितले.
इराणी शासन “कठोर आणि धोकादायक”
ट्रम्प यांनी इराणी शासनाला “अत्यंत कठोर आणि धोकादायक गट” असे संबोधले. त्यांच्या मते, इराण पुन्हा अणुकार्यक्रम उभारण्याचा प्रयत्न करत असून, लांब पल्ल्याच्या क्षेपणास्त्रांचा विकास करत आहे, जे अमेरिका आणि तिच्या सहयोगी देशांसाठी मोठा धोका ठरू शकतात.
ट्रम्प यांनी स्पष्टपणे सांगितले की, “आम्ही इराणची क्षेपणास्त्रे नष्ट करू आणि त्यांची क्षेपणास्त्र उद्योगव्यवस्था पूर्णपणे उद्ध्वस्त करू.” तसेच त्यांनी इराणची नौदल शक्तीही नष्ट करण्याचा इशारा दिला आहे. याशिवाय, त्यांनी इराणच्या आयआरजीसी (इस्लामिक रिव्होल्यूशनरी गार्ड कॉर्प्स) ला शरणागती पत्करण्याचे आवाहन केले आहे.इस्रायलच्या हल्ल्यानंतर ट्रम्प यांनी घेतलेली ही आक्रमक भूमिका पाहता, पुन्हा एकदा मध्य पूर्वेत तणाव वाढण्याची शक्यता असून, ही परिस्थिती इराणसाठी मोठे आव्हान ठरू शकते.