Israel-Iran conflict
जेरुसलेम : बैरूतमध्ये हिजबुल्लासोबत कार्यरत असलेल्या 'इस्लामिक रिव्होल्युशनरी गार्ड कॉर्प्स'च्या (IRGC) क्षेपणास्त्र युनिटचा ऑपरेशन्स कमांडर अबू धर मोहम्मदी याला इस्रायली संरक्षण दलाने (IDF) ठार केल्याचे वृत्त आहे. मोहम्मदी हा हिजबुल्ला आणि इराणी सरकार यांच्यातील महत्त्वाचा दुवा मानला जात असे. लष्करी कारवायांचे नियोजन आणि समन्वय साधण्यात त्याची मोठी भूमिका होती.
'ऑपरेशन नॉर्दर्न ॲरोज'नंतर हिजबुल्लाचा क्षेपणास्त्र कार्यक्रम पुन्हा उभारण्यात आणि बळकट करण्यात अबू धर मोहम्मदी याचा सहभाग होता. याशिवाय, हिजबुल्लाच्या 'रदवान फोर्स'च्या दक्षिण लेबनॉन युनिटचा कमांडर अबू अली रियान याचाही इस्रायलच्या लष्करी कारवाईत मृत्यू झाला आहे. रियान हा हिजबुल्लासाठी सैन्य भरती, शस्त्रास्त्रांची पुरवठा साखळी व्यवस्थापित करणे आणि कारवायांचा समन्वय साधणारा मध्यवर्ती चेहरा होता. या मोहिमेबाबत आणि त्यावेळच्या परिस्थितीबाबत अद्याप अधिकृत तपशील समोर आलेले नाहीत. सुरक्षा विश्लेषकांच्या मते, या घडामोडींमुळे हिजबुल्लाच्या लष्करी क्षमतेवर आणि मध्यपूर्वेतील इराण-समर्थित नेटवर्कवर मोठा परिणाम होऊ शकतो.
इस्रायली संरक्षण दलाने (IDF) इराणमधील “तालेघन” संकुलावर हल्ला केल्याचे सांगितले आहे. इस्रायलच्या दाव्यानुसार, या जागेचा वापर इराणने गतकाळात अण्वस्त्रांशी संबंधित क्षमता विकसित करण्यासाठी केला होता.IDF ने 'X' (ट्विटर) वर पोस्ट केलेल्या निवेदनात म्हटले आहे की, हे संकुल गुप्त “AMAD” प्रकल्पाशी संबंधित होते. २००० च्या दशकाच्या सुरुवातीला अण्वस्त्रे विकसित करण्याच्या उद्देशाने हा कार्यक्रम राबवला जात असल्याचा पाश्चात्य गुप्तचर संस्थांचा दीर्घकाळचा आरोप आहे. , या जागेचा वापर प्रगत स्फोटके तयार करण्यासाठी आणि अण्वस्त्र संशोधनाशी संबंधित संवेदनशील प्रयोगांसाठी केला जात होता, असेही इस्रायली लष्कराने म्हटले आहे.
मध्यपूर्वेतील इराणशी संबंधित संघर्ष थांबण्याची चिन्हे दिसत नसून, गुरुवारी देखील ड्रोन आणि क्षेपणास्त्र हल्ले सुरूच राहिले. युनायटेड नेशन्सच्या (UN) निर्वासित एजन्सीने इशारा दिला आहे की, या युद्धामुळे इराणमध्ये आतापर्यंत सुमारे ३२ लाख लोक विस्थापित झाले आहेत. सुरक्षिततेच्या शोधात बहुतांश नागरिक मोठ्या शहरांमधून पलायन करत आहेत.यूएन एजन्सीच्या म्हणण्यानुसार, विस्थापित लोकांचा मोठा भाग राजधानी तेहरान आणि इतर शहरी केंद्रांमधून बाहेर पडून उत्तर भागातील किंवा ग्रामीण भागांकडे वळला आहे.
संभाव्य परकीय लष्करी कारवाईच्या चिंतेमुळे इराणच्या राजकीय नेत्यांनी आपली आक्रमक भूमिका अधिक तीव्र केली आहे. गुरुवारी इराणच्या संसदेचे अध्यक्ष मोहम्मद बागेर कालीबाफ यांनी इशारा दिला की, पर्शियन गल्फमधील इराणच्या ताब्यातील बेटांवर आक्रमण करण्याचा कोणताही प्रयत्न झाल्यास त्याला हिंसक प्रत्युत्तर दिले जाईल. ते म्हणाले, "अशा कारवाईमुळे पर्शियन गल्फ आक्रमणकर्त्यांच्या रक्ताने लाल होईल." दरम्यान, इस्रायलनेही आपल्या उत्तर सीमेवरील परिस्थितीबाबत इशारा दिला आहे. इस्रायलचे संरक्षण मंत्री योव गॅलंट यांनी धमकी दिली आहे की, हिजबुल्लाचे हल्ले थांबले नाहीत, तर इस्रायल "लेबनॉनचा प्रदेश ताब्यात घेऊ शकतो." सीमाभागातील सततच्या संघर्षामुळे आता व्यापक प्रादेशिक युद्धाची भीती निर्माण झाली आहे.