Lawrence Bishnoi Gang: अमेरिकेच्या FBI ने कुप्रसिद्ध गँग लॉरेन्स बिश्नोई गँगविरूद्ध आतापर्यंतचे सर्वात मोठे ऑपरेशन सुरू केलं आहे. FBI ने त्यांच्या सहयोगी एजन्सींसोबत मिळून ७ जुलै रोजी अमेरिकेच्या कॅलिफोर्नियासह जगभरातील अनेक ठिकाणी मोठं ऑपरेशन राबवलं. या ऑपरेशन अंतर्गत २० लोकांना ताब्यात घेतलं असून त्यांच्याकडून बंदी असलेलं सामान, ड्रग्ज आणि शस्त्रे हस्तगत करण्यात आली आहेत.
एफबीआयने या आंतरराष्ट्रीय क्राईम सिंडिकेटच्या विरूद्ध सुरू केलेल्या ऑपरेशनला ऑपरेशन हार्ड बॉल असं नाव दिलं. एफबीआय आणि त्यांच्या एजंट्सच्या नेतृत्वात अमेरिका, कॅनडा आणि युरोपात जवळपास ५० पेक्षा जास्त ठिकाणी छापेमारी करण्यात आली आहे. या छापेमारीत मोठ्या प्रमाणात बंदी घातलेलं सामान जप्त करण्यात आलं आहे. तसेच मोठ्या प्रमाणात ड्रग्ज देखील जप्त करण्यात आलं आहे.
या ऑपरेशनमध्ये लॉरेन्स बिश्नोई गँगचा पार्टनर गोल्डी बरार आणि जग्गू भगवानपुरिया यांच्याशी निगडीत नेटवर्क निशाण्यावर होते. लॉरेन्स बिश्नोई गँगच्या संबंधातील अनेक वॉन्टेड गँगस्टर अमेरिका, कॅनडा आणि युरोपात अवैधरित्या रहात आहेत. बिश्नोई गँगने फक्त भारतातच नाही तर या देशात देखील आपल्या गुन्हेगारी कृत्यांचं साम्राज्य प्रस्थापित केलं होतं. इथं ते खंडणी गोळा करत आहेत. ते कॅनडा, अमेरिका आणि युरोपात राहणाऱ्या भारतीयांना टार्गेट करून त्यांच्याकडून ते खंडणी वसूल करत होते.
कॅनडा सरकारने गेल्या वर्षी लॉरेन्स बिश्नोई गँगला दहशतवादी संघटना घोषित केलं होतं. लॉरेन्सचा भाऊ अनमोल बिश्नोई अनेक वर्षे अमेरिकेत लपून बसला होता. अमेरिकेत असताना त्याने मुंबईतील एनसीपी नेता बाबा सिद्दिकी यांची हत्या केली होती. तसचे सलमान खानच्या घरावर फायरिंग देखील केली होती. त्यानंतर त्याला अमेरिकेत अटक करून भारतात डिपोर्ट करण्यात आलं आहे.
भारतीय एजन्सींनी देखील वेळोवेळी लॉरेन्सचे नेटवर्क अमेरिका, कॅनडा आणि युरोपात पसरल्याचं सांगतात. भारतातून फरार होऊन हे सर्व मेंबर्स या देशांमध्ये आपला अड्डा बनवून आपलं गुन्हेगारी साम्राज्य चालवत असतात.