Canada changes its immigration policy, find out who will benefit from the new rules
पुढारी ऑनलाईन : कॅनडाच्या एक्स्प्रेस एंट्री प्रणालीत ३ नोव्हेंबरपासून महत्त्वाचे बदल लागू होणार आहेत. तंत्रज्ञान, अभियांत्रिकी आणि आरोग्यसेवा यांसारख्या अधिक वेतन असलेल्या क्षेत्रांतील कामाचा अनुभव आणि नोकरीच्या ऑफरसाठी अतिरिक्त फायदे दिले जाणार आहेत.
कॅनडाच्या नव्या इमिग्रेशन नियमांमुळे आधीपासूनच कॅनडात काम करणाऱ्या कुशल भारतीय व्यावसायिकांना फायदा होण्याची शक्यता आहे. कॅनडाच्या 'एक्स्प्रेस एंट्री' (Express Entry) प्रणालीत करण्यात आलेल्या बदलांनुसार, कॅनडातील कामाचा अनुभव आणि अधिक वेतन असलेल्या व्यवसायांमधील नोकरीच्या ऑफरला अधिक महत्त्व दिले जाणार आहे.
कॅनडाच्या इमिग्रेशन, निर्वासित आणि नागरिकत्व विभागाने (IRCC) १६ ऑक्टोबर रोजी या बदलांची घोषणा केली असून, ते ३ नोव्हेंबरपासून लागू होणार आहेत. एक्स्प्रेस एंट्री प्रणालीअंतर्गत कायमस्वरूपी निवासासाठी (Permanent Residence) अर्ज करण्याचे आमंत्रण मिळवणाऱ्यांमध्ये भारतीय उमेदवारांचा दीर्घकाळापासून सर्वाधिक वाटा राहिला आहे. त्यामुळे नव्या नियमांचा भारतीय उमेदवारांच्या संधींवर मोठा परिणाम होऊ शकतो.
कॅनडात सॉफ्टवेअर इंजिनिअरिंग, माहिती तंत्रज्ञान (IT), आरोग्यसेवा आणि अभियांत्रिकीच्या इतर शाखांमध्ये काम करणाऱ्या लोकांना अतिरिक्त फायदा मिळू शकतो. याउलट, कॅनडाबाहेर राहणाऱ्या आणि कॅनडातील कामाचा अनुभव किंवा पात्र नोकरीची ऑफर नसलेल्या उमेदवारांसाठी स्पर्धा अधिक कठीण होऊ शकते.
नव्या प्रणालीअंतर्गत, अधिक वेतन असलेल्या पात्र व्यवसायांमधील कामाच्या अनुभवासाठी उमेदवारांना ७० पर्यंत अतिरिक्त गुण मिळू शकतात. हे गुण कॅनडातील कामाच्या अनुभवाच्या कालावधीसाठी मिळणाऱ्या गुणांव्यतिरिक्त असतील. तसेच, अधिक वेतन असलेल्या पात्र व्यवसायातील नोकरीच्या ऑफरसाठी १०० पर्यंत गुण मिळू शकतात.
मात्र, उमेदवारांना पात्र कामाचा अनुभव किंवा नोकरीची पात्र ऑफर यांपैकी ज्या पर्यायातून अधिक गुण मिळतील, त्याच पर्यायाचे अतिरिक्त गुण दिले जातील. दोन्ही पर्यायांचे अतिरिक्त गुण एकत्र मिळणार नाहीत.
कॅनडाच्या इमिग्रेशन मंत्री लीना मेटलेज डायब यांनी सांगितले की, कॅनडात यशस्वी होण्यासाठी आवश्यक कौशल्ये असलेल्या स्थलांतरितांची निवड करणे, स्थानिक मनुष्यबळाला पूरक ठरणारे कुशल कर्मचारी आकर्षित करणे आणि देशाच्या आर्थिक विकासाला चालना देणे, हा या बदलांमागील उद्देश आहे.
वेतनाशी संबंधित मुद्दे
नव्या नियमांमध्ये आरोग्यसेवा, अभियांत्रिकी, तंत्रज्ञान, शिक्षण आणि कुशल कामगारांच्या व्यवसायांसह इतर काही निवडक क्षेत्रांचा समावेश असेल. एखाद्या व्यवसायाचे राष्ट्रीय स्तरावरील मध्यम वेतन (Median Wage) कॅनडातील एकूण कामगारांच्या मध्यम वेतनाच्या किमान १.३ पट असल्यास तो व्यवसाय अधिक वेतन असलेला मानला जाईल.
कामाच्या अनुभवासाठी, पात्र व्यवसायांमध्ये किमान १२ महिने किंवा १,५६० तास काम केलेल्या उमेदवारांना वेतनाच्या निकषानुसार २०, ४० किंवा ७० अतिरिक्त गुण मिळू शकतात. ज्या व्यवसायांचे मध्यम वेतन राष्ट्रीय मध्यम वेतनाच्या किमान दुप्पट आहे, अशा व्यवसायांतील अनुभवासाठी सर्वाधिक ७० अतिरिक्त गुण दिले जातील.
कॅनडातील कुशल कामाच्या अनुभवाच्या कालावधीसाठी उमेदवारांना पूर्वीप्रमाणेच गुण मिळत राहतील. पाच वर्षे किंवा त्याहून अधिक पात्र कामाचा अनुभव असलेल्या उमेदवारांना जोडीदार किंवा कॉमन-लॉ पार्टनर नसल्यास ८० पर्यंत गुण मिळू शकतात. तर जोडीदार किंवा कॉमन-लॉ पार्टनर असलेल्या उमेदवारांना ७० पर्यंत गुण मिळू शकतात.
नोकरीच्या ऑफरसाठी मिळणार १०० पर्यंत गुण
अधिक वेतन असलेल्या पात्र व्यवसायांमधील नोकरीच्या ऑफरसाठी संबंधित व्यवसायाच्या वेतनपातळीनुसार ५०, ७० किंवा १०० गुण दिले जातील.
यासाठी नोकरीची ऑफर ही पगारी, पूर्णवेळ आणि सलग रोजगाराची असणे आवश्यक आहे. तसेच, ती कुशल व्यवसायातील असावी आणि उमेदवाराला कायमस्वरूपी निवासाचा दर्जा मिळाल्यानंतर किमान एक वर्ष नोकरी सुरू राहणे अपेक्षित असावे.
ही ऑफर पात्र नियोक्त्याकडून (Employer) मिळालेली असावी. तसेच, संबंधित काम करण्यासाठी उमेदवाराकडे आवश्यक पात्रता असणे गरजेचे आहे.
नोकरीची ऑफर खरी आहे का आणि संबंधित नियोक्ता आपल्या जबाबदाऱ्या पूर्ण करू शकतो का, याची इमिग्रेशन विभागाकडून पडताळणी केली जाईल. मागे घेण्यात आलेल्या किंवा रद्द झालेल्या नोकरीच्या ऑफरला गुणांसाठी पात्र मानले जाणार नाही.
LMIA ची अट हटवली
नव्या नियमांमधील आणखी एक महत्त्वाचा बदल म्हणजे पात्र नोकरीच्या ऑफरसाठी 'लेबर मार्केट इम्पॅक्ट असेसमेंट' (Labour Market Impact Assessment - LMIA) ची अट हटवण्यात आली आहे.
एक्स्प्रेस एंट्री प्रणालीतील उमेदवारांचे स्थान निश्चित करण्यासाठी 'कॉम्प्रिहेन्सिव्ह रँकिंग सिस्टीम' (CRS) अंतर्गत गुण दिले जातात. या गुणांसाठी पात्र नोकरीच्या ऑफरला आता LMIA ची आवश्यकता असणार नाही.
LMIA हा एक असा दस्तऐवज आहे, जो परदेशी कामगाराची नियुक्ती केल्यामुळे कॅनडाच्या स्थानिक रोजगार बाजारावर प्रतिकूल परिणाम होणार नाही, हे दर्शवण्यासाठी नियोक्त्यांना साधारणपणे मिळवावा लागतो.
३ नोव्हेंबरपासून नव्या प्रणालीअंतर्गत गुण मिळवण्यासाठी पात्र नोकरीच्या ऑफरला LMIA ची गरज भासणार नाही. तसेच, कॅनडाच्या 'फेडरल स्किल्ड वर्कर प्रोग्राम' आणि 'फेडरल स्किल्ड ट्रेड्स प्रोग्राम' अंतर्गत काही पात्रता निकष पूर्ण करण्यासाठीही ही अट आवश्यक राहणार नाही.
मात्र, LMIA ची अट हटवण्यात आली म्हणजे सर्वच नोकरीच्या ऑफरला अतिरिक्त गुण मिळतील, असे नाही. केवळ अधिक वेतन असलेल्या पात्र व्यवसायांमधील नोकरीच्या ऑफरलाच नव्या CRS प्रणालीअंतर्गत अतिरिक्त गुण दिले जातील.
इतर व्यवसायांमधील नोकरीच्या ऑफर काही इमिग्रेशन कार्यक्रमांच्या पात्रता अटी पूर्ण करण्यासाठी उपयुक्त ठरू शकतात.
आधीपासून अर्ज केलेल्या उमेदवारांवरही होणार परिणाम
ज्या उमेदवारांची एक्स्प्रेस एंट्री प्रणालीमध्ये आधीपासून प्रोफाइल तयार आहेत, त्यांच्या गुणांची नव्या नियमांनुसार फेरगणना केली जाणार आहे.
ही प्रक्रिया पूर्ण होण्यासाठी दोन आठवड्यांपर्यंत कालावधी लागू शकतो. या काळात कायमस्वरूपी निवासासाठी अर्ज करण्याचे आमंत्रण देणाऱ्या निवड फेऱ्या तात्पुरत्या स्थगित राहण्याची शक्यता आहे.