पुढारी ऑनलाईन डेस्क : कॅबिनेट मंत्रीपद मिळाल्यानंतर हसन मुश्रीफ आज शुक्रवारी कोल्हापुरात दाखल झाले. यावेळी कार्यकर्त्यांकडून त्यांचे जंगी स्वागत करण्यात आले. विधानभवनमध्ये मंत्रीपदाची शपथ घेतल्यानंतर मुश्रीफ पहिल्यांदाच कोल्हापुरात दाखल झाले. (Kolhapur News)
मंत्री हसन मुश्रीफ शुक्रवार (दि. 7) पासून चार दिवसांच्या कोल्हापूर जिल्हा दौर्यावर येत आहेत. राज्याचे कॅबिनेट मंत्री म्हणून शपथ घेतल्यानंतर मुश्रीफ यांचे पहिल्यांदाच कोल्हापुरात आगमन झाले. यावेळी पदाधिकारी, कार्यकर्त्यांनी त्यांचे जोरदार स्वागत केले. आज दुपारी 4 वाजता कागल येथील गैबी चौकात त्यांचा नागरी सत्कार व जाहीर मेळावा होणार आहे. यावेळी मुश्रीफ आपली भूमिका मांडणार आहेत, त्याकडेही जिल्ह्याचे लक्ष लागले आहे.
ताराराणी चौकात त्यांचे आगमन झाले. यावेळी ताराराणी चौक येथे राष्ट्रवादी काँग्रेसच्या वतीने त्यांचे जल्लोषी स्वागत करण्यात आले. ताराराणींच्या पुतळ्याला पुष्पहार अर्पण करून त्यांनी अभिवादन केले. नंतर दसरा चौकात ते राजर्षी शाहूंच्या पुतळ्याला पुष्पहार अर्पण करतील. त्यानंतर शाहू समाधीस्थळावर जाऊन ते अभिवादन करणार आहेत. यानंतर ते छत्रपती शिवाजी चौकात छत्रपती शिवरायांच्या पुतळ्याला पुष्पहार अर्पण करणार आहेत. पुढे अंबाबाईचे दर्शन घेणार आहेत. यानंतर शासकीय विश्रामगृहावर थांबणार आहेत. त्यानंतर ते कागलला रवाना होणार आहेत. (Kolhapur News)