पणजी : पुढारी वृत्तसेवा
पणजी महापालिकेने (सीसीपी) करंझाळे येथे न्यूरोडायव्हर्जट मुलांसाठी विशेषतः ऑटिझम स्पेक्ट्रम (स्वमग्न) असलेल्या मुलांसाठी ४ कोटी रुपयांचे खेळ आणि विकास केंद्र उभारण्याचा निर्णय घेतला आहे.
या सुविधेत न्यूरोडायव्हर्जट मुले, तरुण आणि त्यांच्या कुटुंबांसाठी एक स्वागतार्ह आधार जागा निर्माण करण्याच्या उद्देशाने, संवेदी-अनुकूल खेळाची मैदाने, कला आणि संगीतासाठी जागा, संवेदी उद्याने, काळजी कक्ष आणि मोठ्या तरुणांसाठी जीवन कौशल्य प्रशिक्षण क्षेत्रे असतील.
महापालिकेने या प्रकल्पासाठी डिझाइन सल्लागाराची नियुक्ती करण्याकरिता निविदा काढली असून, त्यासाठी 20 लाख रुपये सल्ला शुल्क प्रस्तावित आहे. पणजी मनपाचे महापौर रोहित मोन्सेरात यांनी या प्रकल्पाचा एक भाग म्हणून एनरिच मेयर मेंट सेंटरवर चर्चा करण्यासाठी, डिझाइन सल्लागार अभिजित मुरुगकर आणि प्रिया रानाडे यांच्यासोबत योजनांचा आढावा घेण्यासाठी एक बैठक घेतली.
आयुक्त क्लेन मदेरा यांच्या म्हणण्यानुसार, एकदा कार्यादेश जारी झाल्यावर हा प्रकल्प पूर्ण होण्यास एक वर्ष लागेल. नियुक्त सल्लागार तपशीलवार वास्तुशास्त्रीय आराखडा, संवेदी-संवेदनशील जागेचे नियोजन आणि दिव्यांग व्यक्ती हक्क कायदा, २०१६ चे पालन करण्यासाठी जबाबदार असेल.
सर्वसमावेशन खेळांचा समावेश...
१६ ते २५ वयोगटातील तरुण व प्रौढांसाठी सर्वसमावेशक खेळ आणि मनोरंजन क्षेत्रे, बाह्य शारीरिक कौशल्य क्रियाकलापांसाठी संरचना, निसर्ग निरीक्षण डेक, निवारा असलेली वाळू आणि पाण्याची खेळण्याची केंद्रे, समुपदेशन आणि सल्ला कक्ष, काळजीवाहूंसाठी आधार जागा आणि संक्रमण व जीवन कौशल्य सुविधा येथे उपलब्ध असतील. केंद्राच्या डिझाइन ब्रीफमध्ये सुगंधी आणि स्पर्शानुभवी वनस्पती असलेली एक संवेदी बाग, उपचारात्मक लँडस्केप लागवड आणि ध्वनिक उपचार, संवेदना-जागरूक प्रकाशयोजना, पर्जन्यजल संचयन आणि सौर-ऊर्जेवर चालणारी रोषणाई यांसारख्या पायाभूत सुविधांचा समावेश अनिवार्य असेल, असे मदेरा म्हणाले.