डिचोली : डिचोली तालुक्यातील नानोडा येथे रविवारी खासगी मिनी बस आणि जीप वाहनामध्ये समोरासमोर भीषण अपघात होऊन १६ प्रवासी जखमी झाले. अपघाताची तीव्रता मोठी असून दोन्ही वाहनांचे मोठे नुकसान झाले आहे.
मिळालेल्या माहितीनुसार, अस्नोडा येथून इब्रामपूरकडे प्रवासी घेऊन जाणाऱ्या मिनी बसला समोरून येणाऱ्या थार वाहनाने जोरदार धडक दिली. अपघातावेळी बसमध्ये सुमारे २५ ते ३० प्रवासी होते. जखमींना तातडीने डिचोली येथील सामाजिक आरोग्य केंद्रात दाखल करण्यात आले. प्राथमिक उपचारानंतर काही जखमींना घरी सोडण्यात आले, तर एका जखमीची प्रकृती गंभीर असल्याने त्याला बांबोळी येथील गोमेको रुग्णालयात हलविण्यात आले आहे.
तसेच तीन जखमींवर डिचोली सामाजिक आरोग्य केंद्रात उपचार सुरू आहेत. अपघाताची माहिती मिळताच आमदार डी. चंद्रकांत शेट्ये यांनी घटनास्थळी भेट देऊन जखमींची विचारपूस केली, दरम्यान, डिचोली पोलिसांनी अपघाताचे नेमके कारण शोधण्यासाठी तपास सुरू केला आहे.
पोलिसांनी गस्त वाढवावी
लार्टबार्से पंचायत क्षेत्रात अनेक फार्महाऊस असल्याने आठवड्याच्या शेवटी बाहेरगावाहून मोठ्या प्रमाणात पर्यटक येतात. पार्टी करून परतताना काहीजण मद्यधुंद अवस्थेत वाहन चालवत असल्यामुळे अपघातांचे प्रमाण वाढत असल्याचा आरोप स्थानिकांनी केला आहे. शनिवार-रविवारी पोलिसांनी गस्त वाढवावी आणि नशेत वाहन चालवणाऱ्यांवर कठोर कारवाई करावी, अशी मागणी स्थानिकांकडून करण्यात येत आहे.