दाबोळी : पुढारी वृत्तसेवा
येत्या रविवारी राज्यात दीपावली उत्सव साजरा करण्यात येणार असल्याने वास्कोचे आमदार कृष्णा साळकर यांनी सर्व शासकीय अधिकाऱ्यांच्या उपस्थितीत वास्को বাজারেরची पाहणी केली. तसेच यंदा दीपावलीचा संपूर्ण बाजार शहरातील महसूल विभागाच्या देव दामोदर ट्रस्टच्या जागेत भरवण्यात येणार असल्याचे जाहीर केले.
सर्व विक्रेत्यांनी मंगळवार (दि. ३) पासून नवीन बाजारात आपला व्यवसाय मुरगाव पालिकेच्या नियमनुसार थाटावा, असे आमदार साळकर यांनी सांगितले. वास्कोत गेल्या आठवड्यात मॉडर्न मार्केटमध्ये आग लागून जी दुर्घटना घडली, तशी दुर्घटना पुन्हा घडू नये, यासाठी वास्कोचे आमदार कृष्णा साळकर, मुरगावचे मामलेदार प्रविणजय पंडित, मुरगावचे पोलिस अधीक्षक गुरुदास कदम,
पोलिस निरीक्षक वैभव नाईक, अग्निशमन दलाचे प्रमुख दिलीप बिचोलकर, मुरगाव पालिकेचे अभियंता देसाई, सेनेतरी निरीक्षक महेश कुडाळकर, पालिका निरीक्षक सचिन पडवळ, माजी नगराध्यक्ष गिरीश बोरकर, माजी नगरसेविका शमी साळकर व बाजारातील विक्रेते उपस्थित होते.
वास्कोत रविवार-सोमवार साजरी होणाऱ्या दीपावलीनिमित्त भरणारा बाजार यंदा महसूल विभागाच्या जागेत मंगळवार (दि. ३) पासून भरायला सुरुवात होणार असल्याचे आमदार साळकर यांनी सांगितले. देव दामोदर ट्रस्टच्या एका बाजूच्या शेड मध्ये दीपावलीचा मुख्य बाजार तर दुसऱ्या शेडमध्ये फटाके, फुले, आकाशकंदील व इतर साहित्य विक्रीसाठी ठेवण्यात येणार असल्याचे आमदार साळकर यांनी सांगितले.
गेल्या अनेक वर्षांपासून वास्कोत दीपावलीचे सामान विकण्यासाठी येणाऱ्यांनी नवीन मार्केटमध्ये व्यवसाय करण्याचे आवाहन आमदार साळकर यांनी केले. तसेच तालुक्यातील सर्व नागरिकांनी शहरातील मध्यभागी असलेल्या नवीन दीपावलीच्या बाजारात येऊन खरेदी करावी, असे आवाहनही आमदार साळकर यांनी केले आहे.