डोंबिवली : शासनाने स्वसंरक्षणासाठी दिलेल्या परवानगीनुसार घेतलेले रिव्हॉल्व्हर सार्वजनिक ठिकाणी खुलेआम मिरविण्यास प्रतिबंध आहे. फक्त स्वसंरक्षणासाठीच या रिव्हॉल्व्हरचा वापर करायचा असतो. शस्त्र परवानाविषयक नियम असताना कल्याणजवळच्या उंबर्डे गावात शुक्रवारी (दि.14) रात्री एकाने चक्क अग्निशत्र परवाना नियमांचा फज्जा उडवला आहे. या महाशयाने त्याच्याकडील रिव्हॉल्व्हर काढून बोटाने फिरवत स्टेजवर गर्दीत प्रदर्शन केले. एकीकडे हळदी समारंभात नाचताना रिव्हॉल्व्हरचे प्रदर्शन करणारा व्हिडियो समाज माध्यमांवर व्हायरल झाल्याने एकच खळबळ माजली आहे. तर दुसरीकडे खडकपाडा पोलिसांनी या घटनेची गंभीर दखल घेऊन रिव्हॉल्व्हर नाचवणार्यासह दोघांवर गुन्हा दाखल केला आहे.
चिंतामण लोखंडे असे रिव्हॉल्व्हरचे प्रदर्शन करणार्या व्यक्तीचे नाव असून ते भाजपाच्या ओबीसी सेलचे उपाध्यक्ष आहेत. लोखंडे हे व्यावसायिक आहेत. खडकपाडा पोलिस ठाण्याचे वरिष्ठ पोलिस निरीक्षक डॉ. अमरनाथ वाघमोडे यांनी या संदर्भात चिंतामण आणि त्यांचा भाऊ शरद लोखंडे या दोघांच्या विरोधात गुन्हा नोंदवून तपास सुरू केल्याची माहिती दिली.
उंबर्डे गावात लग्न सोहळ्याच्या आदल्या दिवशी आयोजित केलेल्या हळदी समारंभात शुक्रवारी रिव्हॉल्व्हर बाहेर काढून बोटाने हवेत गरगरा फिरवत डॉन चित्रपटातील अरे दिवानो मुझे पेहचानो मै हुं डॉन...या गाण्यावर नृत्य केल्याने हा चर्चेचा विषय झाला आहे. चिंतामण लोखंडे असे सोन्याच्या दागिन्यांनी सर्वांग मढवून स्टेजवर नाचणार्या व्यक्तीचे नाव आहे. या स्टेजवर वर्हाडी मंडळी नाचत होती. नाचणार्यांमध्ये लहान मुलांसह महिलांचाही समावेश होता. यावेळी चिंतामण लोखंडे हे स्टेजवर नाचत असताना अचानक त्यांनी उजव्या कमरेला खोचलेले स्वसंरक्षणासाठीचे रिव्हॉल्व्हर बाहेर काढले. हे रिव्हॉल्व्हर बोटात पकडून हवेत गरगर फिरवत स्वतःच्या शस्त्राचे प्रदर्शन करत नाचू लागले. या नृत्याचा उपस्थितांपैकी काहींंनी व्हिडियो तयार करून तो समाज माध्यमांवर व्हायरल केला.
रिव्हॉल्व्हार घेऊन नाचताना जर काही दुर्घटना घडली असती तर त्याची जबाबदारी कुणी घेतली असती ? असा सवाल यानिमित्ताने उपस्थित झाला आहे. या संदर्भात अद्याप पोलिसांनी कोणतीही कार्यवाही केली नाही. मात्र पोलिस अशा घटनेसंदर्भात कशी दखल घेतात याकडे सगळ्यांच्या नजरा आहेत.
दरम्यान, कल्याण परिमंडळ 3 हद्दीत 1 हजार 367 खासगी व्यक्तींकडे वैयक्तिक सुरक्षेकरिता परवानाधारी रिव्हॉल्व्हर आहेत. तर 8 जणांनी नव्याने रिव्हॉल्व्हरसाठी गृह विभागाकडे अर्ज दाखल केल्याचे सूत्रांकडून सांगण्यात आले.
परिमंडळ 3 चे पोलिस उपायुक्त अतुल झेंडे यांनी या व्हिडियोची गंभीर दखल घेऊन संबंधितांवर गुन्हे दाखल करण्याचे आदेश खडकपाडा पोलिसांना दिले. पोलिसांनी व्हायरल झालेल्या या व्हिडियोची पडताळणी करून रिव्हॉल्व्हरधारक चिंतामण लोखंडे आणि त्यांचा भाऊ शरद लोखंडे यांच्या विरोधात शस्त्र प्रतिबंधक कायद्यान्वये गुन्हा दाखल केला. या प्रकरणाची चौकशी केली जाईल. स्वसंरक्षणासाठी असलेल्या शस्त्राचे जाहीर प्रदर्शन खपवून घेतले जाणार नाही, असा इशारा उपायुक्त अतुल झेंडे यांनी या पार्श्वभूमीवर बोलताना दिला आहे.