जळगाव (चोपडा) : चोपडा शहरातील जुन्या पंचायत समिती कार्यालयाजवळील परिसरात शनिवार (दि.24) रोजी मध्यरात्री अनैतिक संबंधांच्या संशयातून प्रियकरानेच एका अज्ञात व्यक्तीचा दगडाने आणि काठीने ठेचून निर्घृण खून केल्याची धक्कादायक घटना उघडकीस आली आहे. संशयित आरोपी राजू काशीराम बारेला (35, मूळ रा. मध्यप्रदेश, सध्या ह.मु. चोपडा) याला शहर पोलिसांकडून काही तासांतच अटक करण्यात आली आहे.
पोलिसांच्या माहितीनुसार, राजू बारेला हा प्यारी बारेला (नाव बदललेले) या ओळखीच्या महिलेसोबत बंद पडलेल्या कार्यालयाच्या परिसरात राहत होता. शनिवार (दि.24) रोजी रात्री २ वाजता परतल्यावर त्याने प्यारीला एका अज्ञात व्यक्तीसोबत पाहिले. त्याच्या मनात अनैतिक संबंधांचा संशय आल्याने रागाच्या भरात त्याने लाकडी काठीने मारहाण केली आणि नंतर मोठ्या दगडाने त्या व्यक्तीचा डोक्यात वार करत खून केला.
खून केल्यानंतर राजू घटनास्थळावरून फरार झाला. मात्र सकाळी ६ वाजता मृतदेह आढळून आल्यावर नागरिकांनी पोलिसांना कळवले. पोलिसांनी तत्काळ तपास सुरू करून सीसीटीव्ही फुटेजच्या आधारे आरोपीचा शोध घेतला आणि गोरगावले रोडवरून त्याला अटक केली आहे. पोलीस कॉन्स्टेबल संतोष पारधी यांच्या फिर्यादीवरून राजू बारेला विरोधात गुन्हा दाखल करण्यात आला असून पुढील तपास सुरू आहे.