जळगाव, पारोळा : तालुक्यातील एका गावात राहणाऱ्या अल्पवयीन मुलीवर अत्याचार झाल्याची संतापजनक घटना उघडकीस आली आहे. या घटनेत संबंधित मुलगी पाच महिन्यांची गर्भवती असल्याचे वैद्यकीय तपासणीत स्पष्ट झाले आहे. या प्रकरणी ‘सोनू’ (पूर्ण नाव व गाव अद्याप अस्पष्ट) याच्याविरुद्ध पारोळा पोलिस ठाण्यात पोक्सो कायद्यांतर्गत गुन्हा दाखल करण्यात आला आहे.
घटनेचा तपशील असा आहे की, पीडित मुलगी आपल्या पालकांसोबत पारोळा तालुक्यातील एका गावात राहते. १ फेब्रुवारी ते ३१ मार्च २०२५ या कालावधीत ती शाळा सुटल्यानंतर पारोळा बसस्थानकावर येत असे. याच दरम्यान तिची ओळख ‘सोनू’ नावाच्या तरुणाशी झाली. या ओळखीचा गैरफायदा घेत आरोपीने तिला दुचाकीवरून एका हॉटेलमध्ये नेले आणि फेब्रुवारी महिन्यात तिच्यावर बलात्कार केला. काही दिवसांनी त्याने पुन्हा दुसऱ्या एका हॉटेलमध्ये नेऊन तिच्यावर अत्याचार केला.
अलीकडे पीडितेला पोटदुखीचा त्रास जाणवू लागल्याने तिला जळगाव येथील जिल्हा शासकीय वैद्यकीय महाविद्यालयात उपचारासाठी नेण्यात आले. तेथे वैद्यकीय तपासणीत ती पाच महिन्यांची गर्भवती असल्याचे धक्कादायक वास्तव समोर आले.
घटनेचा धक्का बसलेल्या पीडितेच्या आईने तत्काळ पारोळा पोलिस ठाण्यात धाव घेऊन तक्रार दाखल केली. त्यानंतर ‘सोनू’ विरोधात बालक लैंगिक अत्याचार प्रतिबंधक कायदा (पोक्सो) अंतर्गत गुन्हा दाखल करण्यात आला आहे. या प्रकरणाचा तपास सहाय्यक पोलीस निरीक्षक योगेश महाजन करत आहेत.