भवरखेडा (धरणगाव, जळगाव) : भवरखेडा गावात घातक रसायनांपासून कृत्रिम दूध तयार करून विक्री करणाऱ्या तरुणाला अन्न व औषध प्रशासन आणि पोलिसांच्या संयुक्त कारवाईत अटक करण्यात आली आहे.
अटक करण्यात आलेल्या व्यक्तीचे नाव सोमनाथ आनंदा माळी (वय 31) असे आहे. तो भेसळयुक्त दूध तयार करत असल्याची माहिती अन्न सुरक्षा अधिकारी किशोर साळुंखे यांना मिळाल्यानंतर त्यांनी धरणगाव पोलिसांना याबाबत कळवले. त्यानंतर पोलिस आणि अन्न व औषध प्रशासनाच्या संयुक्त पथकाने भवरखेडा येथे छापा टाकला.
छाप्यात माळीच्या घरी भेसळीच्या दुधासाठी वापरली जाणारी रसायने आणि उपकरणे आढळून आली. प्राथमिक चौकशीत माळीने भेसळयुक्त दूध तयार करून विक्री करत असल्याची कबुली दिली आहे. या प्रकरणी अन्न सुरक्षा अधिकारी साळुंखे यांनी दिलेल्या फिर्यादीवरून धरणगाव पोलिस ठाण्यात गुन्हा दाखल करण्यात आला आहे. पुढील तपास सुरू आहे.