पुढारी ऑनलाईन डेस्क : भारतीय शेअर बाजारात (Stock Market) आज सोमवारी (दि.७) अस्थिरता दिसून आली. आज बाजारात विक्रीच्या माऱ्यामुळे सेन्सेक्स (Sensex)- निफ्टी (Nifty) सलग सहाव्या सत्रात घसरून बंद झाले. आजच्या ट्रेडिंग सत्रात सेन्सेक्स ९६२ अंकांनी घसरून ८०,७२६ वर तर निफ्टी २५,७०० च्या खाली आला. त्यानंतर त्यात काही प्रमाणात रिकव्हरी दिसून आली. सेन्सेक्स ६३८ अंकांच्या घसरणीसह ८१,०५० वर बंद झाला. तर निफ्टी २१८ अंकांनी घसरून २४,७९५ वर स्थिरावला.
इस्रायल- इराण यांच्यातील युद्ध, परदेशी गुंतवणूकदारांचा कमी झालेला ओघ आणि कच्च्या तेलाच्या वाढत्या किमतीदरम्यान मिडकॅप आणि स्मॉलकॅप निर्देशांकही घसरले. मिडकॅप १.८ टक्क्यांनी घसरला. तर स्मॉलकॅप ३.2 टक्क्यांनी गडगडला. क्षेत्रीय आघाडीवर आयटी वगळता सर्व निर्देशांक लाल रंगात बंद झाले. निफ्टी पीएसयू बँक ३.३ टक्क्यांनी घसरुन बंद झाला. त्याचसोबत हेल्थकेअर, कॅपिटल गुड्स, रियल्टी, मेटल, पॉवर, ऑईल आणि गॅस, मीडिया आणि टेलिकॉम हेही घसरले. निफ्टी आयटी ०.६ टक्क्यांनी वाढला.
सेन्सेक्सवर अदानी पोर्ट्सचा शेअर्स ४ टक्क्यांनी घसरला. त्याचबरोबर एनटीपीसी, एसबीआय, पॉवर ग्रिड, ॲक्सिस बँक, इंडसइंड बँक, एचडीएफसी बँक, टायटन हे शेअर्सही २ ते ३ टक्क्यांनी घसरले. अल्ट्राटेक सिमेंट, टाटा स्टील, जेएसडब्ल्यू स्टील, रिलायन्स, नेस्ले इंडिया, कोटक बँक हे शेअर्स प्रत्येकी १ ते २ टक्क्यांपर्यंत घसरले. तर दुसरीकडे एम अँड एम, आयटीसी, भारती एअरटेल, बजाज फायनान्स, इन्फोसिस हे शेअर्स हिरव्या रंगात बंद झाले.
देशांतर्गत बाजारातील (Stock Market Updates) मागील आठवड्यातील विक्रीच्या सपाट्यानंतर आज सोमवारी सेन्सेक्स आणि निफ्टी तेजीत खुले झाले होते. सुरुवातीच्या व्यवहारात सेन्सेक्स २५० अंकांनी वाढून ८१,९०० वर तर निफ्टी २५ हजारांवर गेला होता. पण त्यानंतर दोन्ही निर्देशांक घसरले. सेन्सेक्स ९६२ अंकांनी घसरला. त्यानंतर काही प्रमाणात रिकव्हरी दिसून आली.
अमेरिकेतील नोकऱ्यांमध्ये सप्टेंबरमध्ये सर्वाधिक वाढ दिसून आली. येथील बेरोजगारीचा दर ४.१ टक्क्यांपर्यंत खाली आला आहे. या पार्श्वभूमीवर डाऊ जोन्स (Dow Jones) आणि नॅस्डॅक कंपोझिट हे निर्देशांक उच्चांकावर बंद झाले होते. आशियाई बाजारातील जपानचा निक्केई निर्देशांक (Nikkei 225) सुमारे २ टक्के वाढला.