पुणे; पुढारी वृत्तसेवा : बारामती लोकसभा मतदार संघातून यावेळी महायुतीचा उमेदवारच विजयी होणार आहे. महायुतीतील आकरा पक्षातील कोणाला उमेदवारी मिळेल आताच सांगू शकत नाही. जी जागा अजित पवार यांच्या पक्षाला जरी सोडली, तरीही त्यांच्या विजयासाठी भाजप सर्व ताकद लावेल, असे मत भाजप प्रदेशाध्यक्ष चंद्रशेखर बावनकुळे यांनी गुरुवारी पुण्यात व्यक्त केले.
भाजपच्या वतीने राबविण्यात येत असलेल्या घर चलो अभियानासाठी धायरीत आल्यानंतर त्यांनी पत्रकारांशी संवाद साधला. ते म्हणाले, बारामती लोकसभा मतदार संघातून राष्ट्रवादी काँग्रेसच्या खासदार सुप्रिया सुळे यांच्या विरोधात कोण उमेदवार असेल, हे महत्त्वाचे नाही. बारामती जिंकणे महत्वाचे आहे. त्यामुळे अजित पवार यांच्या गटाचा उमेदवार बारामतीमध्ये असला तरी त्यालाही विजयी केले जाईल. बारामतीमधून सुप्रिया सुळे यांच्या विरोधात अजित पवार यांची पत्नी सुनेत्रा या निवडणूक लढविणार असल्याची चर्चा राजकीय वर्तुळात आहे. सुळे यांच्या विरोधात पवार कुटुंबियातील उमेदवार देणार का, या प्रश्नावर ते बोलत होते.
ते म्हणाले, बारामती मध्ये महायुतीचा कोण उमेदवार असेल. तो कोणत्या पक्षाचा असेल हे वरिष्ठ नेते ठरवतील. अजित पवार गटाचा उमेदवार असला तरी त्याला महायुतीची ५१ टक्के मते मिळतील. त्यामुळे उमेदवार कोण हे महत्त्वाचे नाही. बारामती जिंकण्याचा निर्धार असून कार्ययकर्ते सहाशे घरांना भेटी देतील, असे त्यांनी स्पष्ट केले. अजित पवार यांचे मुख्यमंत्री होण्याचे स्वप्न स्वप्नच राहील या शरद पवार यांच्या विधानाबाबबत बोलताना ते म्हणाले की, अजित पवार यांना मुख्यमंत्री होण्याची संधी असतानाही त्यांना शरद पवार यांनी मुख्यमंत्री होऊ दिले नाही.
हेही वाचा