अज्ञात वाहनाच्या धडकेत दुचाकीस्वार ठार; पिंपरखेड येथील घटना 

पिंपरखेड(ता. शिरूर); पुढारी वृत्तसेवा : बेल्हे-जेजुरी राज्यमार्गावर पिंपरखेड गावचे हद्दीत बोऱ्हाडेवस्ती नजीक बुधवारी (दि. ११) रात्री सव्वा आठच्या सुमारास अज्ञात वाहनाने धडक देऊन घडलेल्या भीषण अपघातात पिंपरखेड येथील अविनाश नवनाथ गावशेते हा २२ वर्षीय युवक जागीच ठार झाला. याबाबत अशोक दिनकर गावशेते यांनी शिरूर पोलीस स्टेशन येथे फिर्याद दाखल केली. त्यानुसार अज्ञात वाहनचालकाविरुद्ध गुन्हा दाखल करण्यात आला आहे.

मयत अविनाश हा मोटार रिवायडिंगचे काम शिकण्यासाठी लाखणगाव येथे जात असून रात्री सव्वा आठ वाजेच्या सुमारास तो आपल्या दुचाकीवरून पिंपरखेडकडे परतत होता. यावेळी अज्ञात वाहनाने त्याच्या दुचाकीला जोरदार धडक दिली व वाहनचालक आपल्या वाहनासह फरार झाला. या अपघातात अविनाश याचा दुर्दैवी मृत्यू झाला.

दरम्यान या घटनेची माहिती मिळताच शिरूर पोलिसांनी घटनास्थळी धाव घेत अविनाश याचा मृतदेह रुग्णवाहिकेतून शिरूर येथील ग्रामीण रुग्णालयात शवविच्छेदनासाठी नेला. यावेळी शवविच्छेदन झाल्यानंतर मृतदेह नातेवाईकांच्या ताब्यात दिला असून अविनाश याच्यावर पिंपरखेड येथे शोकाकुल वातावरणात अंत्यसंस्कार करण्यात आले.

अविनाश हा आपल्या कुटुंबियांचा एकुलता एक मुलगा असून त्याच्या पाश्चात आई, वडील, आजी, आजोबा, चुलते व बहिण असा परिवार आहे. ऐन तारुण्यात आलेल्या अविनाशच्या मृत्यूने परिसरात शोककळा पसरली असून गावकऱ्यांनी एक दिवसाचा दुखवटा पाळत गाव बंद ठेवले असून धडक दिलेल्या वाहनाचा तातडीने तपास करण्याची मागणी ग्रामस्थांनी केली आहे. या घटनेचा तपास शिरूर पोलीस स्टेशनचे सहाय्यक पोलीस निरीक्षक अमोल पन्हाळकर करत आहेत.