धारवाड : धारवाडमध्ये शनिवारी (दि. 11) झालेल्या राज्य युवक काँग्रेसचे महासचिव फैरोज पठाण यांच्या हत्येप्रकरणी धारवाड पोलिसांनी तातडीने कारवाई करत रात्री उशिरा आठ संशयितांना अटक केली आहे. उप्पिनी बेतागेरीजवळ (ता. धारवाड) त्यांना अटक करण्यात आली. ही हत्या नऊ जणांच्या टोळीने केली होती. नवव्या संशयिताचा शोध सुरु आहे. मोहम्मद शाह, कैफ, गौस, समीर, सद्दाम अशी संशयितांची नावे आहेत.
पठाण यांच्या हत्येनंतर पोलिसांनी तातडीने तीन पथकांची स्थापना करून संशयितांचा शोध सुरू केला होता. संशयितांनी मोबाईल फोन धारवाड-बेळगाव सीमेवर सोडला होता. पोलिसांनी मोबाईलचे लोकेशन शोधल्यानंतर तो सापडला. त्यानंतर प्रमुख संशयित मोहम्मद शाह यांच्या उप्पिनी बेतागेरी येथे लपून बसलेल्या संशयितांना अटक करण्यात आली.
धारवाडमधील पठाण यांच्या घरी सायंकाळी साडेसहाच्या सुमारास झालेल्या हत्येचे दृश्य सीसीटीव्हीत चित्रीत झाले आहे. पठाण कुणाशीतरी फोनवर बोलत असताना संशयिताने त्यांच्या पोटात चाकूने वार केले. नंतर, त्याच्या साथीदारांनीही पठाण यांच्यावर चाकूने वार केले. घटनेच्या 40 सेकंदांच्या आत संशयित तेथून पळून गेले. पोलिस आयुक्त एन. शशिकुमार यांच्या म्हणण्यानुसार मारेकरी पठाण यांचे जवळचे सहकारी होते. ते जवळचे मित्र आणि एकाच राजकीय पक्षाचे सदस्य होते. मात्र, अलीकडेच त्यांच्यात मतभेद निर्माण झाले होते, आणि हेच हत्येचे कारण असल्याचे मानले जात आहे. पठाण यांचे लग्न 24 एप्रिल रोजी होणार होते. पोलिस हत्येच्या कारणाचा तपास करत आहेत.