बेळगाव : पुढारी वृत्तसेवा
परिवहन मंडळाच्या मेकॅनिकने महिलादिनी जीवन संपवल्याची घटना ताजी असताना परिवहन मंडळाच्या चालकाने बसमध्येच गळफास घेऊन जीवन संपवल्याची घटना आज (बुधवार) रोजी बेळगाव येथे बस आगारात ही घटना घडली.
बालचंद्र शिवाप्पा हुक्कोजी (वय 47, रा. मारुती गल्ली, जुनी गांधी नगर) असे जीवन संपवलेल्या चालकाचे नाव आहे. मोठ्या बहिणीच्या मुलीच्या लग्नासाठी आगार व्यवस्थापकाकडे सुट्टीसाठी अर्ज करणाऱ्या परिवहन बस चालकाने रजा न दिल्याने सीबीटी शहापूर नाका ते वडगाव या बसमध्ये गळफास घेऊन जीवन संपवल्याची प्राथमिक माहिती मिळाली आहे. पोलीस घटनास्थळी धाव घेऊन पाहणी करत आहेत.
जागतिक महिला दिनी परिवहन मंडळाच्या केशव कुमडोळी या मेकॅनिकने कर्मचाऱ्यांच्या छळाला कंटाळून जीवन संपवले होते. आता सुटी न दिल्याने परिवहन मंडळाच्या चालक कर्मचाऱ्याने जीवन संपवल्याची घटना समोर आली आहे.